ۋنيۆەرسيادا-2017: الاۋ ەستافەتاسىنىڭ ءوز ءانۇرانى شىقتى

ءانۇران مۋزىكاسىنىڭ اۆتورى - بەلگىلى سازگەر، حالىقارالىق بايقاۋلاردىڭ لاۋرەاتى، ەۋرازيا مادەنيەت قورىنىڭ پرەزيدەنتى ەرۇلان قاناپيانوۆ. ءانۇران سوزدەرىن ق ر- نىڭ ەڭبەك سىڭىرگەن قايراتكەرى، اقىن ءشومىشباي ساريەۆ جازدى.

ءانۇراندى «استانا وپەرا» تەاترىنىڭ جەتەكشى ءسوليسى مايرا مۇحامەد قىزى جانە مەدەت شوتابايەۆ ورىندادى. سونداي-اق، ءانۇراندى جازۋعا «ارت-ۆوكال» توبى اتسالىستى.

ءانۇران اۆتورى ەرۇلان قاناپيانوۆ: «ءانۇراندى شىعارۋ كەزىندە ءبىز قازاقستاندا، ءبىزدىڭ سۇلۋ قالامىز الماتىدا الەمدىك دەڭگەيدەگى اسا ماڭىزدى سپورت جارىستارى وتەتىندىگىنەن شابىت الدىق. ءبىزدىڭ مەگاپوليسكە مىڭداعان سپورتشى، سپورت اۋەسقويلارى مەن تۋريستەر كەلمەك. ولار ءبىزدىڭ تابيعاتىمىزعا ءتانتى بولىپ، الماتىلىقتاردىڭ قوناقجايلىعىنا جوعارى باعاسىن بەرەتىندىگىنە سەنىمدىمىن. وتكىزىلەيىن دەپ وتىرعان ۋنيۆەرسيادا كوپتەگەن جاستاردىڭ سپورتقا دەگەن قىزىعۋشىلىعىن ارتتىرادى دەپ ۇمىتتەنەمىن»، دەپ اتاپ ءوتتى.

ال ءانۇراندى ورىنداۋشى مايرا مۇحامەد قىزى Instagram-داعى پاراقشاسىندا: «ماعان وسى كەرەمەت ءاندى ورىنداۋدى ۇسىنعان كەزدە ول ماعان بىردەن ۇنادى. ال ءان جانىڭا جاقىن بولسا، ونى ءوز جۇرەگىڭنەن وتكىزبەي ورىنداۋ مۇمكىن ەمەس!»، دەپ جازادى.

الاۋ ەستافەتاسىنىڭ ءانۇرانى 2017-جىلدىڭ 25- قاڭتارىندا استاناداعى نازاربايەۆ ۋنيۆەرسيتەتىندە وتكىزىلەتىن الاۋدى تۇتاتۋ سالتاناتىندا، سونداي-اق، قازاقستاننىڭ بۇكىل ايماقتارىندا وتكىزىلەتىن ەستافەتانىڭ كەلەسى كەزەڭدەرىندە شىرقالاتىن بولادى.

اۆتور: كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى