الماتى-2017: قىسقى ۋنيۆەرسيادا ويىندارىنا تۇڭعىش رەت قاتىساتىن ەل بەلگىلى بولدى - فوتو

بۇل تۋرالى almaty2017.com سايتى حابارلايدى.

ەڭ قىزىعى، ءوز تاريحىندا تۇڭعىش رەت قىسقى ۋنيۆەرسياداعا قاتىساتىن ۋگاندانىڭ نامىسىن جالعىز سنوۋبوردشىسى قورعايدى. ونىڭ ەسىمى - برولين ماۆەدجە. ول اتالمىش سايتقا بەرگەن سۇحباتىندا الماتىداعى دوداعا قالاي دايىندالىپ جاتقانى تۋرالى ايتىپ بەردى.

«وتكەن ەكى جىلدا مەن پارك سيتي يۋنايتەد (ParkCityUnited) دەپ اتالاتىن سنوۋبورد كومانداسىندا جاتتىقتىم. ءدال وسى كوماندادا 2014-جىلعى وليمپيادا چەمپيونى سەدجۋ كوتسەنبۋرگ تا جاتتىعىپ، باپكەرلەر ونىڭ ءتورت جىلدىقتىڭ باستى دوداسىندا جوعارعى ناتيجە كورسەتۋىنە ىقپال جاسادى. قازىر مەن باپكەرلەرىممەن بىرگە 28-قىسقى ستۋدەنتتەر ويىنىنا دايىندىعىمنىڭ ارنايى جوسپارىن جاسادىق. مەن ءبىرقاتار حالىقارالىق جارىستارعا قاتىسقانمىن. اتاپ ايتسام: ريپ كەرل پرو (RipCurlPro)، ريەۆ-تۋر (Rev-Tour) تاعى باسقا دا جارىستار. جانە دە ءوزىم وقيتىن كوللەدجدە ەكى جىلدان بەرى سنوۋبوردشىلار كومانداسىندامىن. ءوز ويىمشا، 2017-جىلعى ۋنيۆەرسياداعا قاتىسۋعا تولىقتاي دايىنمىن»، - دەدى برولين ماۆەدجە.

سونداي-اق، ۋگاندا سپورتشىسى ۋنيۆەرسيادانىڭ ءوز ومىرىنە قانشالىقتى ماڭىزعا يە ەكەنىن تىلگە تيەك ەتە وتىرىپ، افريكا جۇرتشىلىعىنىڭ ونىمەن ماقتاناتىن كۇننىڭ تۋاتىنىنا سەنىم ءبىلدىردى.

«الداعى ۋنيۆەرسيادا بىزدەر ءۇشىن تاريحي وقيعا. ويتكەنى، ۋگاندا، العاش رەت ستۋدەنتتەردىڭ قىسقى ويىندارىنا قاتىسپاق. ەلىمنىڭ نامىسىن قورعاۋ ماعان بۇيىرىپتى. جالعىز ءوزىم جۇكتى ارقالاعان سوڭ، ەلىمنىڭ مەرەيىن اسىرعىم كەلەدى».

«مەن جارىس ۋاقىتىندا جاڭا دوستار تابامىن دەپ ويلايمىن. بارلىق قاتىسۋشىلارعا ۋاقىتتى كەرەمەت وتكىزۋىنە، جارىستىڭ ءساتتى بولۋىن تىلەيمىن»، - دەدى برولين ماۆەدجە.

كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى