ءماجىلىس: 2017 - جىلى بازالىق زەينەتاقى تاعايىنداۋ ءتارتىبى وزگەرتىلەدى
زاڭ جوباسىندا زەينەتاقى جۇيەسىنە قاتىسۋ وتىلىنە بايلانىستى بازالىق زەينەتاقى تاعايىنداۋ ءتارتىبى وزگەرتىلەدى، اتاپ ايتقاندا، بۇل وزگەرىس 2017 - جىلدىڭ 1 - شىلدەسىنەن باستاپ جۇزەگە اسادى.
بۇل رەتتە بازالىق زەينەتاقى ازاماتتار زەينەتكەرلىك جاسقا جەتكەن كەزدە عانا جانە زەينەتاقى جۇيەسىنە قاتىسۋ وتىلىنە بايلانىستى تاعايىندالادى. زەينەتاقى جۇيەسىنە قاتىسۋ ءوتىلى 10 جىلدان از جانە ەڭبەك ءوتىلى بولماعان جاعدايدا بازالىق زەينەتاقىنىڭ مولشەرى ەڭ تومەن كۇنكورىس دەڭگەيىنىڭ 50 پايىزىنا تەڭ بولادى. بۇدان بولەك، 10 جىلدان ارتىق ەڭبەك وتىلىندە ءاربىر جىل ءۇشىن 2 پايىزعا ارتىپ وتىرادى. ءبىراق، ەڭبەك ءوتىلى 35 جانە ودان دا كوپ جىل بولعان جاعدايدا زەينەتاقى ەڭ تومەنگى كۇنكورىس دەڭگەيىنىڭ 100 پايىزىنان اسپاۋى ءتيىس.
سونىمەن قاتار، زاڭ جوباسى ارقىلى اسكەري قىزمەتكەرلەردى، اسكەري قۇرىلىمدارداعى قىزمەتكەرلەردى زەينەتاقىمەن قامسىزداندىرۋ 2016 - جىلدىڭ 1 - قاڭتارىنان باستاپ مەملەكەتتىك بيۋدجەت ەسەبىنەن جۇزەگە اسىرىلادى. بۇدان بولەك، ازاماتتاردىڭ زەينەتاقىمەن قامتاماسىز ەتىلۋى بويىنشا جۇمىس بەرۋشىلەردىڭ جاۋاپكەرشىلىگىن كۇشەيتۋ ماقساتىندا 2018 - جىلدىڭ 1 - قاڭتارىنان زەينەتاقى جۇيەسىنىڭ جاڭا شارتتى- جيناقتاۋشى قۇرامداسىن ەنگىزۋ ۇسىنىلادى. بۇل جۇمىس بەرۋشىنىڭ ەسەبىنەن جۇمىسشى كىرىسىنىڭ بەس پايىزى مولشەرىندە مىندەتتى زەينەتاقى جارنالارىنان قالىپتاسادى. جۇمىس بەرۋشىلەر تاراپىنان اۋدارىلاتىن بەس پايىزدىق مىندەتتى زەينەتاقى جارناسى ءبىرىڭعاي جيناقتاۋشى زەينەتاقى جۇيەسىندە اشىلعان ءاربىر جۇمىسشىنىڭ شارتتى زەينەتاقى شوتىندا كورسەتىلەتىن بولادى. مۇنداي زەينەتاقى سالىمدارى ازاماتتاردىڭ مەنشىگى بولىپ تابىلمايدى.
اۆتور: قانات مامەتقازى ۇلى
