قازاقستان 2017 -جىلى مۇناي ءوندىرۋ بولجامىن 85,5 ميلليون تونناعا دەيىن كوتەردى
«2017 - جىلى 81 ميلليون توننا مۇناي ءوندىرۋ جوسپارلانعان بولاتىن. قاشاعان، تەڭىز جانە قاراشىعاناق سياقتى ءىرى جوبالاردىڭ ەسەبىنەن مۇناي ءوندىرۋدىڭ ناقتى بولجامى 85,5 توننانىڭ كولەمىندە»، - دەدى ق ر ەنەرگەتيكا ءمينيسترى قانات بوزىمبايەۆ «كازاحستانسكايا پراۆدا» گازەتىنە بەرگەن سۇحباتىندا.
ونىڭ ايتۋىنشا، مينيسترلىك جەتەكشىلىك ەتەتىن سالالارداعى كورسەتكىشتەر تۇراقتى، ديناميكاسى دا ايتارلىقتاي ءتاۋىر. جەكەلەي العاندا قاڭتار- قازان ايلارىندا مۇناي ءوندىرۋ كولەمى 71,1 ميلليون توننانى قۇراپ، وتكەن جىلعى دەڭگەيدەن 11,4 پايىزعا اسىپ ءتۇستى.
وندىرىلگەن گاز كولەمى 43,5 ميلليارد تەكشە مەترگە جەتتى، بۇل - وتكەن جىلعى ءدال وسى كەزەڭمەن سالىستىرعاندا 15,6 پايىزعا ارتىق. 86,6 ميلليون توننا كومىر (ءوسىم 11,6 پايىز) بەرىلىپ، 83,1 ميلليارد كۆت/ساع ەلەكتر ەنەرگياسى ءوندىرىلدى (وتكەن جىلدىڭ ءدال وسى كەزەڭىمەن سالىستىرعاندا 9,8 پايىزعا ارتىق) »، - دەدى قانات بوزىمبايەۆ.
سونىمەن بىرگە، مينيستر جىل سوڭىنا قاراي اتىراۋداعى مۇناي وڭدەۋ جانە پاۆلودارداعى مۇناي- حيميا زاۋىتتارىنىڭ رەكونسترۋكتسياسى مەن جاڭالاۋ جۇمىستارى اياقتالاتىنىن ايتتى.
«شىمكەنتتەگى مۇناي وڭدەۋ زاۋىتىن جاڭعىرتۋ جۇمىستارى الداعى جىلدىڭ ءبىرىنشى جارتىجىلدىعىندا ءوز مارەسىنە جەتەدى. اتالمىش جوسپارلار ءوز جەمىسىن بەرگەن كەزدە، ءبىز وتاندىق مۇنايدى تەرەڭدەتىپ وڭدەپ، تازا مۇناي ونىمدەرىن شىعارىپ قانا قويماي، ونىڭ ساپاسىن ەۋرو- 4، ەۋرو-5 دەڭگەيىنە جەتكىزەمىز»، - دەدى ول.
مينيسترلىكتىڭ 2018 -جىلعا نەگىزدەلگەن ءىس- جوسپارلارى ەلباسى قويعان ناقتى تاپسىرمالاردى جۇزەگە اسىرۋ، ۇلت جوسپارى اياسىندا «100 ناقتى قادام» ماقساتتارىمەن جالعاسپاق. سونىمەن قاتار، جۇمىستىڭ باسىم بولىگى ەل ءىشىن مۇناي ونىمدەرىمەن قامتاماسىز ەتۋ، كومىر، گاز، مازۋت، ديزەل وتىنى سياقتى ستراتەگيالىق تاۋارلاردىڭ باعاسىن نەگىزسىز كوتەرۋگە جول بەرمەۋگە باعىتتالادى. دامۋدىڭ ودان ارعى جولدارى تەڭىز، قاراشىعاناق جوبالارىن دامىتۋ اياسىندا جەر قويناۋىن پايدالانۋشى ءىرى كومپانيالارمەن ارىپتەستىك ورناتۋ، گازدى كەرى ايداۋ، مۇناي ءوندىرۋدى ۇلعايتۋ جۇمىستارىمەن جالعاسادى، - دەدى ق ر ەنەرگەتيكا ءمينيسترى.
