قازاقستاندا 2017- جىلعى 1 - شىلدەدەن باستاپ زەينەتاقى جۇيەسىنە قاتىسۋ وتىلىنە بايلانىستى بازالىق زەينەتاقى تاعايىندالادى
بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندەگى بريفينگتە ق ر دەنساۋلىق ساقتاۋ جانە الەۋمەتتىك دامۋ ۆيتسە- ءمينيسترى سۆەتلانا جاقىپوۆا ايتتى.
«2017 - جىلعى 1 - شىلدەدەن زەينەتاقى جۇيەسىنە قاتىسۋ وتىلىنە بايلانىستى بازالىق زەينەتاقى تاعايىندالادى. زەينەتاقى وتىلىنە قاتىسۋ ءوتىلى 10 جىل جانە ودان كەم بولعان جاعدايدا بازالىق زەينەتاقى كۇنكورىس دەڭگەيى مولشەرىنىڭ 50 پايىزىن قۇراپ، 10 جىلدان اسقاندا ءاربىر تولىق جىل ءۇشىن كۇنكورىس دەڭگەيى مولشەرىنىڭ 2 پايىزى مولشەرىندە ۇلعايىپ وتىرادى»، - دەدى س. جاقىپوۆا.
ونىڭ اتاپ وتۋىنشە، 2018 - جىلدان جۇمىسكەر تابىسىنىڭ 5 پايىز جارناسىن ءبىرىڭعاي جيناقتاۋشى زەينەتاقى قورىندا اشىلعان شارتتى زەينەتاقى شوتىنا اۋدارۋ ەسەبىنەن شارتتى جيناقتاۋشى كومپونەنتى ەنگىزىلەدى. جۇمىسكەر زەينەتاقى جاسىنا جەتكەندە جانە جۇيەگە قاتىسۋ ءوتىلى 5 جىلدان كەم ەمەس جاعدايدا شارتتى جيناقتاۋشى كومپونەنتتەن بەرىلەتىن زەينەتاقى مولشەرى شارتتى زەينەتاقى شوتىندا قالىپتاسقان زەينەتاقى قۇقىعىنا جانە بولجامدى ءومىر ءسۇرۋ ۇزاقتىعىنا بايلانىستى انىقتالادى.
«زەينەتاقى ءومىر بويى تولەنەدى جانە مۇراگەرلىككە بەرىلمەيدى»، - دەدى ول.
اۆتور: مارلان جيەمباي
