ازيادا-2017: قازاقستان جۇلدەلەر سانىن 19 عا جەتكىزدى

ون توعىز جۇلدەنىڭ بەسەۋى التىن، التاۋى كۇمىس، سەگىزى قولا مەدال. ءبىراق، جالپى ەسەپتەگى ورىنىمىز ءالى دە وزگەرگەن جوق.

بۇگىن ەڭ ءبىرىنشى بولىپ كەشە بياتلوننان «التىن» العان وتانداسىمىز يان ساۆيتسكيي كۇمىس جۇلدەنى جەڭىپ الدى. ودان كەيىن وسى سايىستا قىزدارىمىز جارىس جولىنا شىعىپ، ءبىر التىن، ءبىر قولا مەدال جەڭىپ الدى. «التىندى» كەشە عانا جەڭىس تويىن تويلاعان ارۋىمىز الينا ۆيشنيەۆسكايا قانجىعاسىنا بايلاسا، قولانى داريا ۋسانوۆا ەنشىلەدى.

ودان كەيىن فريستايلدان سىنعا تۇسكەن سپورتشىلارىمىز مەرەيىمىزدى اسىردى. سپورتتىڭ بۇل تۇرىنەن قورجىنىمىزعا بەسىنشى التىن مەن كەزەكتى قولا مەدال ءتۇستى. التىندى ايەلدەر اراسىنان يۋليا گالىشيەۆا جەڭىپ السا، قولانى ەرلەر اراسىنان دميتريي رەيحەرد قانجىعاسىنا بايلادى.

شاڭعى سپورتىنان دا قۇرالاقان قالعان جوقپىز. جىگىتتەرىمىز 4×7,5 شاقىرىمدىق ەستافەتالىق سايىستا جارىس قوجايىندارىنان كەيىنگى ەكىنشى ورىندى يەلەندى. وكىنىشكە قاراي، قىزدار اراسىندا وتكەن ەستافەتالىق شاڭعى جارىسىندا ءبىزدىڭ جەرلەستەرىمىز جەڭىس تۇعىرىنا ءبىرتابان جاقىنداپ، ءتورتىنشى ورىنعا جايعاستى.

ال بۇگىنگى كۇننىڭ سوڭعى مەدالىن، ياعني سەگىزىنشى قولا مەدالدى شاڭعىشى مارات جاپاروۆ جەڭىپ الدى.

سونداي- اق، بۇگىنگى كۇننىڭ تاعى ءبىر باستى جاڭالىعى - حوككەيدەن قازاقستان قۇراماسى Ⅷ قىسقى ازيادا ويىندارىنىڭ فينالىنا شىقتى. وتانداستارىمىز جارتىلاي فينالدا قىتاي قۇراماسىن 8:0 ەسەبىمەن ويسىراتا ۇتتى.

 ال بۇگىن جالپى ەسەپتە جاپونيا قۇراماسى وڭتۇستىك كورەيادان الىستاپ كەتتى. ولاردىڭ ەنشىسىندە قازىرگى تاڭدا 57 جۇلدە (19 التىن، 20 كۇمىس، 18 قولا) بار. ەكىنشى ورىنداعى وڭتۇستىك كورەيا قۇراماسىنىڭ ەنشىسىندە 41 جۇلدە (14 التىن، 13 كۇمىس، 14 قولا) بار. ال ۇزدىك ۇشتىكتەن تۇسپەي كەلە جاتقان قىتاي قۇراماسى بىزدەن الىستاپ كەتتى. ولاردا 24 جۇلدە (9 التىن، 8 كۇمىس جانە 7 قولا) بار.

اۆتور: كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى