ەلباسى: 2016 -جىلدىڭ سوڭىنداعى سىرتقى ەكونوميكالىق ساپارلارىم جاقسى ناتيجەلەرمەن اياقتالۋدا

 بۇل تۋرالى مەملەكەت باسشىسى نۇرسۇلتان نازاربايەۆ كورەيا رەسپۋبليكاسىنا مەملەكەتتىك ساپارىنىڭ قورىتىندىسى بويىنشا وتاندىق ب ا ق وكىلدەرى ءۇشىن وتكىزىلگەن باسپا ءسوز بريفينگىندە ءمالىم ەتتى.

 ەكى ەلدىڭ قارىم- قاتىناسى تاۋەلسىزدىكتىڭ العاشقى جىلدارىنان باستاپ جاقسى بولعانىنا توقتالعان مەملەكەت باسشىسى، «سونىڭ ارقاسىندا وسى جىلداردا وڭتۇستىك كورەيادان قازاقستانعا 10 ميلليارد دوللارعا جۋىق تىكەلەي ينۆەستيتسيا كەلدى. قازىرگى كەزدە ەلىمىزدە 500 كورەي- قازاق بىرلەسكەن كومپانيالارى جۇمىس ىستەۋدە. كەشەگى كەزدەسۋلەردە بايقادىڭىزدار، وسى ەلدىڭ ەڭ ءىرى كومپانيالارىنىڭ باسشىلىعىمەن كەزدەسۋلەر ءوتتى. ولار دۇنيەءجۇزىنىڭ كوپتەگەن ەلدەرىندە جۇمىس ىستەيتىن ترانس ۇلتتىق كومپانيالار جانە بىزگە ولار وتە قاجەت. 17 كومپانيانىڭ باسشىسى ءسوز سويلەدى، ولاردىڭ بارلىعى دا قازاقستاندا جۇمىس ىستەۋگە نيەتى بار. وسى رەتتە ءبىز بۇل قاتىناستاردى پايدالانۋىمىز كەرەك. اتاپ ايتقاندا، وڭتۇستىك كورەيا باسشىلىعى، جالپى مەملەكەت ءبىزدى ۇلكەن قۇرمەتپەن قارسى الدى»، - دەدى.

 سونىمەن قاتار ەلباسى ساپار اياسىندا ەكىجاقتى بيزنەس- فورۋم وتكەنىن، وسى ورايدا 1,5 ميلليارد دوللارعا جۋىق قارجىعا كەلىسىمشارت جاسالعانىن اتاپ ءوتتى. مۇنىمەن قوسا، پرەزيدەنت جاسالىپ جاتقان ەڭ ۇلكەن جۇمىستىڭ ءبىرى بالقاشتاعى جىلۋ ەلەكتر ستانساسىنا قاتىستى ەكەنىن ەسكە سالدى.

 «ءبىز كورەي كومپانيالارىنىڭ، سونىڭ ىشىندە LG كومپانياسىنىڭ گاز- حيميا كەشەنىنىڭ ءىرى جوباسىنا اتسالىسۋى جونىندە اڭگىمەلەستىك»، - دەدى مەملەكەت باسشىسى.

ن. نازاربايەۆ بۇل ەل قازاقستانعا زور قىزىعۋشىلىق تانىتىپ، ەلىمىزدەن بارعان دەلەگاتسياعا ايرىقشا ىقىلاس بىلدىرگەنىن، سونداي- اق ءتيىستى قۇجاتتارعا، كورەيا ءۇشىن قازاقستاننىڭ ورتالىق ازياداعى ستراتەگيالىق ءمانىن ايقىندايتىن بىرلەسكەن مالىمدەمەگە قول قويىلعانىن جەتكىزدى. «مەنىڭ شەت ەلدەرگە 2016 -جىلدىڭ سوڭىنداعى سىرتقى ەكونوميكالىق ساپارلارىم جاقسى ناتيجەلەرمەن اياقتالۋدا. ءبىز جاڭادان دوستار تاۋىپ، ارىپتەستەرمەن بىرگە باعىتىمىزدى ايقىندادىق»، - دەدى نۇرسۇلتان نازاربايەۆ.

ءسوز سوڭىندا پرەزيدەنت بۇل باعىتتاعى اتقارىلعان كەلىسسوزدەر قازاقستان ەكونوميكاسىنىڭ دامۋىنا، بۇكىل حالىقتىڭ ءال- اۋقاتىن ودان ءارى جاقسارۋىنا ەلەۋلى پايداسىن تيگىزەتىنىن اتاپ ءوتتى.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى