ەۋرو-2016: پورتۋگاليا يسلانديامەن تەڭ ءتۇستى

سەنت-ەتەن قالاسىنىڭ «جوففرۋا-گيشار ستاديونىندا وتكەن كەزدەسۋ 1:1 ەسەبىمەن اياقتالدى.

يسلانديا ەۋروپا چەمپيوناتىنىڭ فينالدىق كەزەڭىنە العاش رەت شىعىپ وتىرعان كوماندا. لارس لاگەربەكتىڭ كومانداسى تۇڭعىش قادامىن جامان باستاعان جوق.

كەزدەسۋ رونالدۋ مەن نانيدىڭ وتكىر شابۋىلىمەن باستالدى. ءوز كەزەگىندە يسلانديالىقتار دا شەتتە قالعان جوق، گيلفي سيگۋردسسون تەپكەن دوپقا قاقپاشى رۋي پاتريسيۋ توسقاۋىل بولدى.

ارى قاراي ويىن قارقىنى ارتا بەردى. ناني مەن رونالدۋ جاقسى سوققىلار جاسادى، الايدا حاننەس حالدەرسسون ءوزىن مىقتى قاقپاشى ەكەنىن تاعى ءبىر دالەلدەدى.

دەگەنمەن، قايتا-قايتا قارسىلاستارىن قىسپاققا العان پورتۋگاليا فۋتبولشىلارى ءبىرىنشى تايمدا ەسەپ اشتى. ويىننىڭ 31-مينۋتىندا ناني قاپتالدان بەرىلگەن پاستى قاقپاعا سۇڭگىتتى.

ەكىنشى تايم پورتۋگالدىقتاردىڭ شابۋىلىمەن جالعاستى. ءبىراق، يسلانديالىقتار 51-مينۋتتا گول سالىپ، جانكۇيەرلەرىن ءبىر قۋانتىپ تاستادى. گول اۆتورى - بيركير بيارناسسون.

پورتۋگاليا قۇراماسى قولدا تۇرعان جەڭىستىڭ سۋسىپ كەتكەنىنە قاپالانىپ، يسلانديالىقتاردىڭ قاقپاسىنا لاپ قويدى. دەگەنمەن، كوپ شابۋىلدىڭ ەشقايسىسى ناتيجەلى بولمادى.

ايتا كەتەيىك، فۋتبولدان ەۋروپا چەمپيوناتى فرانسيادا وتۋدە. بىرىنشىلىكتىڭ اياسى بيىلدان باستاپ كەڭەيىپ، قۇرلىقتىق دودادا 16 قۇراما ەمەس، 24 كوماندا وينايتىن بولادى. فۋتبول سۇيەر قاۋىم «كارى قۇرلىقتىڭ» ەڭ مىقتى قۇرامالارىنىڭ قاتىسۋىمەن 51 ماتچ تاماشالاي الادى.

ەۋروپا بىرىنشىلىگى فرانسيانىڭ ون قالاسىندا 10- ماۋسىم مەن 10- شىلدە ارالىعىندا وتەدى.

بارلىق ماتچتار «قازاقستان» مەن «قازسپورت» تەلەارنالارىندا تىكەلەي ەفيردە كورسەتىلەدى.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى