العاشقى شاعىن سپۋتنيك بايقوڭىردان 2016-جىلدىڭ قازان ايىندا ۇشىرىلادى
بۇل تۋرالى قىزىلوردا وبلىسىنىڭ اكىمى قىرىمبەك كوشەربايەۆتىڭ ماسكەۋ قالاسىنا جۇمىس ساپارى بارىسىندا بەلگىلى بولدى.
اكىمنىڭ باسپا ءسوز قىزمەتىنىڭ حابارلاۋىنشا، ساپار مەملەكەت باسشىسىنىڭ وڭىرلەردە يننوۆاتسيا قىزمەتىن بەلسەندىرۋ ءۇشىن حالىقارالىق قارجى جانە يننوۆاتسيا ورتالىقتارىمەن جۇمىسى جونىندەگى تاپسىرماسى بويىنشا رەسەيلىكتەر تاراپىنىڭ شاقىرتۋىمەن بولدى.
ساپار اياسىندا وبلىس اكىمى ماسكەۋدەگى «سكولكوۆو» يننوۆاتسيالىق ورتالىعىنىڭ قىزمەتىمەن تانىستى.
«كەزدەسۋدە تاراپتار «بايقوڭىر» كەشەنىندە تەلەكوممۋنيكاتسيالىق جانە عارىش باعىتىندا بىرلەسىپ جۇمىس ىستەۋ جايىن تالقىلادى. ناقتىلاي كەتسەك، اڭگىمەنىڭ تاقىرىبى بىرلەسىپ شاعىن سپۋتنيكتەر ۇشىرۋ جايىندا. وسىنداي العاشقى شاعىن سپۋتنيكتى «سكولكوۆو» وربيتالدىق ۇشىرىلىم ورتالىعى مەن ماسكەۋ يننوۆاتسيالىق ينستيتۋتى بىرلەسىپ جاساپ، 2016-جىلدىڭ قازان ايىندا بايقوڭىردان ۇشىرادى»، - دەلىنگەن حابارلامادا.
وبلىس اكىمى سكولكوۆو ينستيتۋتىنىڭ ماگيسترلىك باعدارلاماسىنا ماسكەۋ مەن سانكت-پەتەربوردىڭ جەتەكشى وقۋ ورىندارىندا رەسەي تاراپىمەن كەلىسىم بويىنشا ءبىلىم الىپ جاتقان قىزىلوردالىق جاستاردى جىبەرۋگە قىزىعۋشىلىق تانىتتى.
سونىمەن بىرگە، ساپار بارىسىندا وبلىس اكىمى ر ف ۇكىمەتىمەن قۇرىلعان «ستراتەگيالىق باستامالار اگەنتتىگىنىڭ» باسشىلىعىمەن كەزدەستى.
