قازاقستاننىڭ ورتا مەكتەپتەرىنە «ورتاق تۇركى تاريحى» وقۋلىعى 2016 - جىلدان باستاپ ەنگىزىلمەك - د . قىدىر الى

 بۇل تۋرالى الماتىدا «عىلىم ورداسى» ر م ك كەشەنىندە «ورتالىق ازياداعى تاريحناما جانە دەرەكتەر: وتكەنى، بۇگىنى جانە بولاشاعى تۋرالى جاڭا زەرتتەۋلەر» اتتى حالىقارالىق سەمينار- پراكتيكۋم بارىسىندا حالىقارالىق تۇركى اكادەمياسىنىڭ پرەزيدەنتى، تاريح عىلىمدارىنىڭ دوكتورى، پروفەسسور دارحان قىدىرالى ءمالىم ەتتى.

«ءبىز بۇعان دەيىن وسىنداي وقۋلىقتى ازىرلەپ جاتقانىمىز جايىندا ايتقان بولاتىنبىز. قازىر وقۋ قۇرالى دايار. تۇجىرىمداماسى جاسالدى. وقۋلىقتىڭ باعدارلاماسى سەگىزىنشى سىنىپقا ارنالعان. ەندى وسى وقۋ قۇرالىنىڭ سوڭعى نۇسقاسىن ازەربايجان، قازاقستان، قىرعىزستان جانە تۇركيانىڭ ءبىلىم مينيسترلىكتەرى بەكىتسە بولعانى. الداعى جىلدان باستاپ مەكتەپ باعدرلاماسىنا ەنگىزىلەدى دەپ   كۇتىپ وتىرمىز. وقۋلىق ەجەلگى داۋىردەن باستاپ 15- عاسىرعا دەيىنگى كەزەڭدى قامتيدى. ەندى الدىمىزدا 15- عاسىردان باستاپ، كۇنى بۇگىنگە دەيىنگى كەزەڭدى قامتيتىن تاريح وقۋلىعىن جازۋ مىندەتى تۇر، - دەدى د. قىدىرالى.

ايتا كەتەلىك، تۇركىتىلدەس ەلدەردىڭ باسشىلارى 2012 - جىلى بىشكەكتە وتكەن تۇركى كەڭەسىنىڭ II سامميتىندە «تۇركى تاريحى» ءپانىن ورتا مەكتەپتەردە وقىتۋ بويىنشا ورتاق شەشىمگە كەلگەن بولاتىن.

وقۋلىق ازەربايجان، قازاقستان، قىرعىزستان جانە تۇركيانىڭ ورتا ءبىلىم بەرەتىن مەكەمەلەرىنىڭ وقۋ باعدارلاماسىنا كومەكشى وقۋ قۇرالى رەتىندە ەنگىزىلەدى.  

 اۆتور :   جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى