كاسپي تەڭىزىنىڭ قۇقىقتىق مارتەبەسى تۋرالى كەلسىمگە 2016 - جىلى قول قويىلۋى مۇمكىن - ە. ىدىرىسوۆ
بۇگىن پارلامەنت ماجىلىسىندەگى ۇكىمەت ساعاتىندا ق ر سىرتقى ىستەر ءمينيسترى ەرلان ىدىرىسوۆ وسىلاي مالىمدەدى.
«كاسپي تەڭىزىنىڭ قۇقىقتىق مارتەبەسىنە قاتىستى كەلىسسوزدەر ۇدەرىسى وتە كۇردەلى، 22 جىل بويى جالعاسىپ كەلەدى. دەگەنمەن، تەڭىزدىڭ قۇقىقتىق مارتەبەسىنە قاتىستى قۇجاتقا قول قوياتىن كەزەڭگە جاقىنداي تۇستىك. ناقتىراق ايتساق، كونۆەنسيانىڭ 60 پايىزعا جۋىعى پىسىقتالعان، دەگەنمەن، كۇردەلى، شەشىمىن تاپپاعان ماسەلەلەر دە بارشىلىق. بۇل ماسەلەلەر قۇبىرلار توسەۋ، كەمەلەردىڭ ەركىن ءجۇزۋى، كاسپي بيو رەسۋرستارىن قورعاۋ، قورشاعان ورتانى قورعاۋعا قاتىستى ماسەلەلەر. كاسپي تەڭىزى جاعالاۋىنداعى اسكەري قىزمەتتەر بويىنشا سۇراقتار دا كۇردەلى»، - دەدى ە. ىدىرىسوۆ.
ءمينيستردىڭ ايتۋىنشا، قازاقستان ءۇشىن، اسىرەسە كاسپي تەڭىزىندە قۇبىرلار سالۋ ماسەلەسى وزەكتى بولىپ تابىلادى. وسى تۇرعىدان قازاقستان مەن ازەربايجان جانە تۇركىمەنستان ورتاق پوزيتسيا ۇستانسا، رەسەي مەن يراننىڭ ۇستانىمى بولەك. مينيستر بۇل وتە نازىك شەشىمدى تالاپ ەتەتىن اسا كۇردەلى ماسەلە ەكەنىن العا تارتادى.
«يران مەن رەسەي تەڭىزدە قۇبىرلار سالۋدى كاسپي جاعالاۋىنداعى بەس مەملەكەتتىڭ بارلىعىنىڭ كەلىسىمىمەن جۇرگىزىلسىن دەپ وتىر. قازاقستان مەن ازەربايجان بۇعان قارسى. ەگەر قازاقستان مەن ازەربايجان تەڭىز تابانىنان قۇبىر سالعىسى كەلسە، وندا ءبىز رەسەي مەن يرانعا بارىپ، ولاردىڭ دا رۇقساتىن الۋعا ءتيىس ەكەنبىز. مىنە، ءبىز بۇعان قارسى بولىپ وتىرمىز. ويتكەنى، بۇل ازەربايجان مەن قازاقستانعا قاتىستى عانا ماسەلە بولعاندىقتان، ونى ءوزارا شەشكىمىز كەلەدى»، - دەدى مينيستر ە. ىدىرىسوۆ.
«سوڭعى رەت استراحان سامميتى اسا ماڭىزدى بولدى، وندا مەملەكەت باسشىلارى كونۆەنتسياعا ەنگىزىلەتىن اسا ماڭىزدى قۇجاتتارعا قول قويىلدى. ال كاسپي بويىنشا كەلەسى سامميت 2016 - جىلى استانادا وتپەك، وسى سامميتتە مەملەكەت باسشىلارى كونۆەنتسياعا قول قويۋ تاپسىرمالارىن جۇمىس توبىنا جۇكتەگەن بولاتىن. بۇل اسا ۇلكەن ءارى كۇردەلى شارۋا، ويتكەنى تەڭىز جاعالاۋىنداعى مەملەكەتتەر ورتاق كەلىسىمگە كەلمەگەن، سونىڭ ىشىندە كەيبىر ايماقتار بويىنشا ورتاق پىكىر ايقىندالماعان ماسەلەلەر ءالى دە كۇن تارتىبىندە بار»، - دەدى ە. ىدىرىسوۆ.
اۆتور: قانات مامەتقازى ۇلى
