ستۋدەنتتەر ستيپەندياسى 2016- جىلدان باستاپ 25 پايىزعا ارتادى - قارجى ءمينيسترى

بۇل تۋرالى بۇگىن ماجىلىستە «2015-2017 - جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىنىڭ تانىستىرىلىمى بارىسىندا ءمالىم بولدى.

الداعى ءۇش جىلدا رەسپۋبليكالىق بيۋدجەت شىعىستارىنىڭ باسىم بولىگى ازاماتتاردىڭ الەۋمەتتىك قورعالۋىن قامتاماسىز ەتۋگە باعىتتالعان شارالاردى ىسكە اسىرۋعا نەگىزدەلەدى.

ماسەلەن، قارجى ءمينيسترى باقىت سۇلتانوۆتىڭ ايتۋىنشا، ەلباسى تاپسىرماسىنا سايكەس مەملەكەتتىڭ الەۋمەتتىك سالاداعى جاڭا مىندەتتەمەلەرى 2015 - جىلى 194 ميلليارد تەڭگە كولەمىندە باعالانادى. ال بۇنىڭ كولەمى 2017 - جىلى 600 ميلليارد تەڭگەگە دەيىن ۇلعاياتىن بولادى.

 «اتاپ ايتقاندا، 2015 - جىلعى 1- شىلدەدەن باستاپ ازاماتتىق قىزمەتكەرلەرگە ەڭبەك اقىنىڭ جاڭا مودەلىن ەنگىزۋگە - 157 ميلليارد تەڭگە، «ب» كورپۋسى مەملەكەتتىك اكىمشىلىك قىزمەتشىلەرىنىڭ ەڭبەكاقى دەڭگەيىنىڭ 2015 - جىلعى 1 - شىلدەدەن باستاپ 15 پايىز جانە 2016 - جىلعى 1- شىلدەدەن باستاپ تاعى دا 15 پايىز كولەممەن ارتۋىنا ءۇش جىلدىق مەرزىمدە جالپى سوماسى 94 ميلليارد تەڭگە كوزدەلگەن. بۇدان بولەك، ستيپەنديالاردىڭ 2016 - جىلعى 1 - قاڭتاردان باستاپ 25 پايىز ارتۋىنا بايلانىستى قوسىمشا 23 ميلليارد تەڭگە قاراستىرىلىپ وتىر» ، - دەيدى ب. سۇلتانوۆ.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى