ق ر ۇلتتىق مۋزەيىنە 2015-جىلى تابىلعان ارحەولوگيالىق ولجالار توپتاماسى تاپسىرىلدى
ۇلتتىق مۋزەيدىڭ مالىمەتىنشە، ارحەولوگيالىق ولجالار قازاق عىلىمي-زەرتتەۋ مادەنيەت ينستيتۋتىنىڭ باستاماسىمەن قۇلان جانە وتىرار قالاشىقتارىندا تابىلدى. قۇلان نىسانىندا ارحەولوگتار س. ش. اقىلبەكتىڭ جەتەكشىلىگىمەن العاش رەت ورتاعاسىرلىق قالاشىق تسيتادەلىنىڭ ورتالىق بولمەسىن تاپتى. بۇل نىسان جامبىل وبلىسىنداعى قۇلان دەپ اتالاتىن اۋىلعا جاقىن جەردە ورنالاسقان. ول تۋرالى ەڭ العاش VIII عاسىردا قىتايلىق جانە اراب تاريحشىلارىنىڭ دەرەكتەرىندە ايتىلادى.
ال عىلىمي تۇرعىدا قالاشىق وتكەن عاسىردىڭ 60-جىلدارى ارحەولوگ ك. م. بايپاقوۆتىڭ جەتەكشىلىگىمەن زەرتتەلگەن ەدى. تسيتادەل مەن شاحريستانعا شۋرف سالىنىپ، قالانىڭ اينالاسىندا بىرنەشە نىساندار زەرتتەلدى. سول ۋاقىتتا قالادا تۇرعان اۋقاتتى ادامداردىڭ شاراپ وندىرەتىن ورىندارى مەن ءۇي-جايلارى، سونداي-اق بيلەۋشىنىڭ قالا سىرتىنداعى رەزيدەنتسياسى انىقتالدى.
2000-جىلدارى قالانىڭ ماڭىندا زەرتتەۋ جۇمىستارىن اكادەميك ك. بايپاقوۆ پەن ا. نۇرجانوۆ جۇرگىزدى. وتكەن جىلدىڭ تامىز ايىندا بيلەۋشىنىڭ سارايىنداعى ورتالىق عيمارات زەرتتەلدى. بىرەگەي قابىرعاداعى جاپسىرىلعان ورنەكتىڭ ساقتالۋى مامانداردىڭ تاراپىنان جوعارى باعاعا يە بولدى. ورنەكتەلگەن كومپوزيتسيا س. ش. اقىلبەكتىڭ ءسوزى بويىنشا سول ۋاقىتتا ءار ءتۇرلى ءدىن مەن مادەنيەتتىڭ بولعاندىعىن دالەلدەيدى. ەسكەرتكىش شامامەن العاندا، VII- VIII عاسىرلارعا جاتادى.
ك. م. بايپاقوۆتىڭ جەتەكشىلىگىمەن وتىرار قالاشىعىندا جۇرگىزىلگەن عىلىمي-زەرتتەۋ جۇمىستارىنىڭ ناتيجەسىندە ەرتە ورتا عاسىرعا جاتاتىن ەلۋدەن استام مادەني جانە تۇرمىستىق جادىگەرلەر تابىلدى.
اۆتور: رۋسلان عابباسوۆ
