كوكشەتاۋدا «قانسونار-2015» رەسپۋبليكالىق تۋرنيرى مارەسىنە جەتتى - فوتو
ءيىسى قازاققا ورتاق سپورت سايىسىنا اتىراۋ، پاۆلودار، اقتوبە، جامبىل، قاراعاندى، اقمولا وبلىستارى مەن استانا قالاسىنان جيىرما ءۇش بۇركىتشى قاتىستى. تۋرنيردى وبلىس اكىمىنىڭ ورىنباسارى نۇرلان نۇركەنوۆ اشىپ، جينالعانداردى كەلە جاتقان تاۋەلسىزدىك كۇنى مەرەكەسىمەن قۇتتىقتادى.
«بۇل سايىستىڭ ءبىزدىڭ وڭىردە ءوتىپ جاتقانىنا ون جىلدىڭ ءجۇزى بولدى. ەلىمىز تاۋەلسىز مەملەكەت اتانعاننان بەرى ۇلتتىق سپورتقا باسا نازار اۋدارىلا باستادى. ەلباسى ءبىر سوزىندە ءبىز وزىمىزگە جاقىن ۇلتتىق قۇندىلىقتاردىڭ ساقتالۋىن قاداعالاۋ قاجەتتىگىن ايتقان بولاتىن. سول سەبەپتى، ۇلتتىق سپورتتى دامىتۋ، جاس تولقىنعا ناسيحاتتاۋ - ءبىزدىڭ باستى ماقساتىمىز» ، - دەي كەلە نۇرلان نۇركەنوۆ قاتىسۋشىلارعا ساتتىلىك تىلەدى.
تارتىستى وتكەن سايىس قورىتىندىسى بويىنشا بۇركىت باپتاۋشىلار اراسىندا جامبىل وبلىسىنىڭ نامىسىن قورعاعان باقداۋلەت باباجان سىننان سۇرىنبەي ءوتىپ، ءبىرىنشى ورىندى جەڭىپ الدى. ەكىنشى جانە ءۇشىنشى ورىنداردى جەرلەسىمىز قانات شولەنبايەۆ پەن استانالىق ارمانبەك كۇنتۋعان ءوزارا ءبولىستى.
