اقتاۋلىق ءاليا مەرگەنبايەۆا «قازاقستان ارۋى-2015» جەڭىمپازى اتاندى - فوتو، كەسكىن
بيىل «قازاقستان ارۋى-2015» جەڭىمپازىن قازاقستاندىقتار ونلاين جانە س م س داۋىس بەرۋ ارقىلى تاڭدادى. جەڭىمپازدىڭ ەسىمىن جاريالاۋ ءۇشىن ساحناعا وليمپيادا چەمپيونى، ۆەلوشاباندوز الەكساندر ۆينوكۋروۆ شىقتى. ەسكە سالا كەتسەك، اقتىق كەزەڭگە قازىلار القاسىنىڭ شەشىمىمەن 5 ارۋ وتكەن بولاتىن.
بايقاۋعا قازاقستاننىڭ ءار وبلىسىنان 30 ۇمىتكەر قاتىستى. بايقاۋعا قاتىسىپ وتىرعانداردىڭ ىشىندە جۋرناليست، حالىقارالىق زاڭگەر سىندى ماماندىق يەلەرى بار. ءتىپتى، مەكتەپ وقۋشىلارى دا باعىن سىناي كەلگەن.
«قازاقستان ارۋى-2015» جەڭىمپازىنا 5 ميلليون تەڭگە سىيلىقپەن قاتار ەتنوستيلدەگى قىز جاساۋى تارتۋ ەتىلدى. قازاقتىڭ ءداستۇرلى قىز جاساۋى «التىن وردا» اۆتورلىق ديزاين ءۇيى شەبەرلەرىنىڭ قولىمەن جاسالعان. سالتاناتتى جيىنتىققا «ماحاببات كورپەسى»، ساندىقتار، «بەدەرلى ورنەكتەر» شال جاستىعى، قولدان تىگىلگەن جاستىقتار، سونداي-اق ءداستۇرلى داستارقان كىرەدى. وسىنىڭ بارلىعىن ۇلتتىق ءداستۇردى ۇرپاقتان ۇرپاققا دارىپتەۋدى ماقسات تۇتىپ وتىرعان ەتنو-ديزاينەر ىرزا تۇرسىنزادا جاساپ وتىر.
قازىلار القاسىنا تاعايىندالعان ادامداردىڭ ىشىندە ەلىمىزدىڭ تانىمال ءارى قۇرمەتتى ازاماتتارى: قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجايەۆا، «استانا» فۋتبول كلۋبىنىڭ باس مەنەدجەرى قايسار بەكەنوۆ، عارىشكەر ايدىن ايىمبەتوۆ جانە اكتريسا اسەل ساعاتوۆا بولدى.
سونىمەن بىرگە، قازىلار قاتارىنا «ميلوسەرديە» قايىرىمدىلىق قورىنىڭ ديرەكتورى ارۋجان ساين، ۆەلوشاباندوز الەكساندر ۆينوكۋروۆ، «استانا جاستارى» جاستار ورتالىعىنىڭ باسشىسى ءانۋار نۇپەيىسوۆ، «التىن وردا» اۆتورلىق ديزاين ءۇيىنىڭ ەتنو-ديزاينەرى ىرزا تۇرسىنزادا جانە «قازاقستان ارۋى» بايقاۋىنىڭ پرەزيدەنتى الەنا ريۆلينا-كىرباسوۆا كىرگەن ەدى.
