سايلاۋ-2015: كانديدات ت. سىزدىقوۆ قوستانايدا «بايان سۇلۋ» كونديتەر فابريكاسىنىڭ ۇجىمىمەن كەزدەستى
كەزدەسۋ بارىسىندا كانديدات سىزدىقوۆ ءوزىنىڭ سايلاۋالدى تۇعىرناماسىنىڭ باستى باعىتتارىمەن تانىستىردى.
الدىمەن، ول قازاقستان كوممۋنيستىك حالىقتىق پارتياسىنىڭ قىزمەتى عىلىمي سوتسياليزم يدەيالارى، ماركستىك-لەنيندىك ءىلىم مەن پروگرەسسيۆتى قوعامدىق ويلارعا نەگىزدەلىپ قۇرىلعانىن اتاپ ءوتتى.
«ءبىز قوعامدىق دامۋدىڭ ءبىرتۇتاس ماتەرياليستىك تەورياسى رەتىندە ماركسيزم-لەنينيزمنىڭ عىلىمي جانە يدەولوگيالىق نەگىزدەرىنە سۇيەنىپ قىزمەت اتقارامىز.
ماركسيزم كوممۋنيستەر ءۇشىن - قورشاعان الەمنىڭ وزگەرۋىمەن بىرگە ۇنەمى دامىپ وتىراتىن، قوعامنىڭ دامۋىنداعى قوردالانعان جانە جاڭا دەرەكتەردى وي ەلەگىنەن وتكىزەتىن شىعارماشىلىق عىلىم.
العا قويىلعان ماقساتتارعا جەتۋ ءۇشىن ماركسيزم-لەنينيزمدى جانە قازاقستان كوممۋنيستىك حالىقتىق پارتياسىنىڭ باعدارلامالىق شارتتارى مەن ونىڭ قىزمەتىن ناسيحاتتاۋ قاجەت» دەلىنگەن ت. سىزدىقوۆتىڭ سايلاۋالدى تۇعىرناماسىندا.
سونىمەن قاتار، تۇرعىن سىزدىقوۆ ءوزىنىڭ سايلاۋالدى تۇعىرناماسىنىڭ تاعى ءبىر قاعيداتى - باتىس مادەنيەتىنىڭ تەرىس ىقپالى جايىندا ماسەلە كوتەردى.
«رۋحانيلىقتىڭ ءمانىن تۇسىرەتىن باتىس قۇندىلىقتارى ماقساتتى تۇردە استامشىل تۇتىنۋشىلىق سانا قالىپتاستىرۋدا»، - دەپ اتاپ ءوتتى ءوز سوزىندە.
ادامنىڭ پسيحيكاسى مەن دەنساۋلىعىنا تىكەلەي قاۋىپ توندىرەتىن اقپاراتتىق ىقپالدار بار.
مىسالى، جاي عانا كومپيۋتەرلىك ويىنشىقتاردىڭ ءوزى پسيحيكا مەن دەنساۋلىققا كەرى اسەرىن تيگىزەدى»، - دەدى سىزدىقوۆ.
«ەۋروپالىق ەلدەردە تۇتىنۋشىلىق قوعام قۇرىلىمدارىنىڭ قالىپتاسۋىنان تۋىنداعان باتىستىق مادەنيەت داعدارىسى باتىستىق وركەنيەتتىڭ امبەباپ قۇندىلىقتار مەن الەۋمەتتىك تۇرمىس- تىرشىلىك نورمالارىنا دەگەن نارازىلىقتارىنا قاراما- قايشى كەلۋدە»، - دەلىنگەن كانديداتتىڭ سايلاۋالدى تۇعىرناماسىندا.
سونداي-اق كەزدەسۋ بارىسىندا قوستاناي وبلىستىق كوميتەتىنىڭ ءبىرىنشى حاتشىسى الپىسباي الىمبايەۆ جينالعان جۇرتتى ايماقتىق سايلاۋالدى شتابتىڭ جۇمىسىمەن تانىستىردى.
«ءبىزدىڭ شتاب كانديداتتى قولداۋ بويىنشا قاجەتتى اقپاراتتىق جانە ۇگىت جۇمىستارىن جۇرگىزۋدە. ءبىزدىڭ شتابتا 5 سەنىمدى تۇلعا بار، ولار ناسيحات ماتەريالدارىن تاراتۋ جانە حالىقپەن كەزدەسۋدى ۇيىمداستىرۋ جۇمىستارىن اتقارۋدا».
