پاۆلودار وبلىسىنىڭ 2015-جىلعى ناقتىلانعان بيۋجەتى 112 ميلليارد تەڭگەنى قۇرادى
وبلىستاعى ەكونوميكا جانە بيۋجەتتىك جوسپارلاۋ باسقارماسىنىڭ باسشىسى تالعات ءشارىپوۆتىڭ مالىمەتىنشە، بيىلعى جىلى رەسپۋبليكالىق بيۋجەت شىعىندارىنىڭ 22,7 ميلليارد تەڭگەگە وڭتايلاندىرىلۋىنا بايلانىستى وبلىستىق بيۋجەتكە تۇسەتىن ترانسفەرتتەر مەن نەسيەلەر كولەمى قىسقارتىلدى.
«بۇل قاراجاتتىڭ 1,4 ميلليارد تەڭگەسى بالاباقشالارعا مەملەكەتتىك تاپسىرىستى جۇزەگە اسىرۋ جوسپارلانعان بولاتىن. 200 ميلليون كوللەدجدەردىڭ زەرتحانالارى مەن شەبەرحانالارىن جاڭارتۋعا، ال 684 ميلليون مەديتسينالىق ۇيىمداردى جابدىقتاۋعا جۇمسالۋى ءتيىس ەدى. سونىمەن قاتار 1,7 ميلليارد تەڭگە شاعىن قالالاردى اباتتاندىرۋعا، ال 748 ميلليون تەڭگە «بيزنەستىڭ جول كارتاسى-2020» باعدارلاماسى بويىنشا اۋىل كاسىپكەرلەرىن نەسيەلەندىرۋگە جۇمسالۋى قاجەت بولاتىن. وڭىردەگى بيۋجەتتىك ۇيىمداردىڭ قىزمەتكەرلەرىنە جالاقىنى ارتتىرۋ مەرزىمىن 2016-جىلعا شەگەرۋدىڭ ارقاسىندا 230 ميلليون تەڭگە ۇنەمدەلدى»، - دەيدى ت. ءشارىپوۆ.
باسقارما باسشىسىنىڭ ايتۋىنشا، پاۆلودار وبلىسىنىڭ بيۋجەتىنە «نۇرلى جول» جاڭا ەكونوميكالىق ساياسات شەڭبەرىندە رەسپۋبليكانىڭ ۇلتتىق قورىنان 6,4 ميلليارد تەڭگە اۋدارىلماق. 240 ميلليون تەڭگە اقسۋ قالاسىنداعى 280 ورىنعا شاقتالعان بالاباقشا قۇرىلىسىنا، 1,6 ميلليارد تەڭگە پاۆلودار قالاسىندا تۇرعىن ءۇي سالاسىن دامىتۋعا، 3,2 ميلليارد تەڭگە ەكىباستۇز قالاسىنداعى جىلۋ جانە سۋمەن قامتاماسىز ەتۋگە جۇمسالماق. 781,9 ميلليون تەڭگە ايماقتاعى مەكتەپكە دەيىنگى ءبىلىم بەرۋ ۇيىمدارىنا مەملەكەتتىك تاپسىرىسقا باعىتتالسا، 600 ميلليون تەڭگە مال شارۋاشىلىعىن دامىتۋعا بولىنبەك.
«ەنگىزىلگەن وزگەرىستەردى ەسەپتەگەندە 2015-جىلعى ناقتىلانعان بيۋجەتى 112 ميلليارد تەڭگەنى قۇرادى. ولاردىڭ قاتارىندا رەسپۋبليكالىق بيۋجەتتەن وبلىستىق بيۋجەتكە تۇسەتىن ماقساتتى ترانسفەرتتەر مەن نەسيەلەر 44,5 ميلليارد تەڭگەگە تەڭ»، - دەپ ءسوزىن تۇيىندەدى ت. ءشارىپوۆ.
