قازاقستاننىڭ ەڭ سۇلۋ ارۋى ايداي يسايەۆا «ميسس الەم-2014» بايقاۋىنا دايىندالۋدا - فوتو

قازىر ايداي 25- قاڭتاردا ماياميدە (ا ق ش) وتەتىن سۇلۋلىق بايقاۋلارىنىڭ بىرىنە قاتىسۋعا قىزۋ دايىندالىپ جاتىر. ونىڭ فوتوسۋرەتتەرى «الەم ارۋى» رەسمي سايتىندا جاريالانادى. ماڭىزدى جۇمىستى قازاقستاننىڭ تانىمال فوتوگرافتارىنىڭ ءبىرى دانيل ولەينيك قولعا الدى.

ءبىر ساعاتقا جۋىق سوزىلعان فوتوسەسسيا بارىسىندا «قازاقستان ارۋى» ءۇش كيىم اۋىستىردى. اتاپ ايتساق، Sherri Hill ۇسىنعان سالتاناتتى كەشكى كويلەك، ىسكەرلىك جانە كۇندەلىكتى كيىم ۇلگىلەرىن كيدى.

25 جاستاعى ايداي يسايەۆا اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ تۇلەگى. قازىرگى تاڭدا ول الماتى قالالىق 1№ ەمحانادا وتباسىلىق دارىگەر بولىپ قىزمەت ەتەدى.

بايقاۋعا بايلانىستى ەمحانا باسشىلىعى بويجەتكەندى جۇمىستان بوساتىپ، 3 ايعا اقىسىز دەمالىسقا شىعاردى.

«باسشىلىعىم ماعان تۇسىنىستىكپەن قاراپ، جۇمىستان بوساتىپ وتىر. قازىر ۋاقىتىم فيتنەس زالداردا، اعىلشىن تىلىنەن كۋرستاردا ءوتىپ جاتىر. بوس ۋاقىتىمدا تەلەارنالارعا سۇحبات بەرىپ، ءتۇرلى مادەني شارالارعا قاتىسامىن»، - دەدى ايداي يسايەۆا.

قازاقستان ارۋى الدىنا كەلگەن ادامداردىڭ كوپشىلىگى ونى تانىماي جاتاتىنىن ايتادى. سەبەبى، وتباسىلىق دارىگەر كوبىنەسە قاريالار مەن جاس سابيلەردى قابىلدايدى.

جەلتوقسان ايىنا دەيىن كەلىسىم-شارتقا قول قويىلعاندىقتان ايداي وتباسىن قۇرۋدى جوسپارلاپ جۇرگەن جوق.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى