پارلامەنت 2014 - جىلدىڭ ناقتىلانعان بيۋدجەتىن قابىلدادى
ەندى پارلامەنت قابىلداعان قۇجات مەملەكەت باسشىسىنىڭ قول قويۋىنا جولدانادى.
اتالعان زاڭ نەگىزىنەن 2014 - جىلدىڭ 9- ايىنداعى رەسپۋبليكالىق بيۋدجەتتىڭ ناقتى تۇسىمدەرى مەن شىعىستارىنا نەگىزدەلگەن وزگەرتۋلەردى قامتيدى. ال بولجامدى ناقتىلاۋعا سۇيەنسەك، جالپى ىشكى ءونىمنىڭ ناقتى ءوسىمى 104,3 پايىز دەڭگەيىندە بولجانىپ وتىر. سونىمەن قاتار بولجام بويىنشا ونەركاسىپ ونىمدەرىن ءوندىرۋ 0,2 پايىزعا قىسقارىپ، ەكونوميكانىڭ نەگىزگى وسىمىنە 5,4 پايىزعا ارتقان قىزمەت كورسەتۋ سالاسى ۇلەس قوساتىن بولادى.
وسىعان بايلانىستى، رەسپۋبليكالىق بيۋدجەتتەن 2014 - جىلعا تۇسىمدەردىڭ ناقتىلانعان بولجامى 6 ترليون 107,4 ميلليارد تەڭگە بولىپ بەلگىلەندى، ونىڭ ىشىندە 2014 - جىلعى بەكىتىلگەن جوسپارعا قاراعاندا 420,7 ميلليارد تەڭگەگە ازايىپ، ترانسفەرتتەردى ەسەپتەمەگەندە 3 940,4 ميلليارد تەڭگە سوماسىنداعى كىرىس كوزدەلىپ وتىر. بۇدان بولەك، سالىق تۇسىمدەرىنىڭ ازايۋى 460,5 ميلليارد تەڭگەنى جانە سالىق ەمەس تۇسىمدەردىڭ ۇلعايۋى 39,5 ميلليارد تەڭگەنى قۇرايدى. ال 2014 - جىلعى رەسپۋبليكالىق بيۋدجەتتىڭ شىعىستارى 7 190,3 ميلليارد تەڭگەنى قۇرايدى. سونىمەن قاتار 2014 - جىلعا ارنالعان ۇلتتىق قوردان بەرىلەتىن كەپىلدەندىرىلگەن ترانسفەرتتەر مولشەرى بەكىتىلگەن 1480 ميلليارد تەڭگە كولەمىندە ساقتالىپ، ماقساتتى ترانسفەرت مولشەرى 325,0 ميلليارد تەڭگەگە ۇلعايادى. ال بيۋدجەت تاپشىلىعى ىشكى جالپى ونىمگە 2,6 پايىزعا ناقتىلانىپ وتىر، بۇل كورسەتكىش بۇعان دەيىن 2,3 پايىز دەڭگەيىندە بەكىتىلگەن ەدى.
«بيۋدجەتتى ناقتىلاۋدىڭ ماڭىزدى ماقساتىنىڭ ءبىرى مەملەكەت باسشىسىنىڭ تاپسىرماسىنا سايكەس ەكونوميكالىق قاۋىپسىزدىكتى، تۇراقتىلىقتى جانە ەكونوميكانى ىنتالاندىرۋدى قامتاماسىز ەتۋگە باعىتتالاتىن ۇلتتىق قوردان 325 ميلليارد تەڭگە سوماسىندا نىسانالى ترانسفەرتتى تارتۋ بولىپ تابىلادى. اتاپ ايتقاندا، بانك سەكتورىن ساۋىقتىرۋ ءۇشىن «پروبلەمالى كرەديتتەر قورى» اق قارجىلاندىرۋعا 250 ميلليارد تەڭگە، ارنايى ەكونوميكالىق ايماقتاردىڭ ينفراقۇرىلىم وبەكتىلەرىن سالۋعا اۋماقتارعا 50 ميلليارد تەڭگە، «ۇلتتىق مۇناي حيميالىق تەحنوپاركى» ارنايى ەكونوميكالىق ايماعى 24,5 ميلليارد تەڭگە، «قورعاس شىعىس قاقپاسى» ارنايى ەكونوميكالىق ايماعى 24,5 ميلليارد تەڭگە سومادا قاراجات قاراستىرىلادى»، - دەدى قارجى ءمينيسترى باقىت سۇلتانوۆ.
اۆتور: قانات مامەتقازى ۇلى
