نانكين-2014: بولاشاق جۇلدىزدارىمىزدىڭ جولىن اشقان وليمپيادا - فوتو

 38 التىن، 13 كۇمىس، 14 قولا مەدال العان جارىس قوجايىندارى جالپى ەسەپتە كوش باستاسا، 27 التىن، 19 كۇمىس، 11 قولا ەنشىلەگەن رەسەيلىكتەر ەكىنشى ورىندى، 10 التىن، 5 كۇمىس، 7 قولا مەدال ەنشىلەگەن ا ق ش قۇراماسى ۇزدىك ۇشتىكتى قورىتىندىلادى.

بۇل جەتىستىك - جەرلەستەرىمىزدىڭ جاسوسپىرىمدەر اراسىنداعى جازعى وليمپيادا ويىندارىنداعى جاڭا كورسەتكىشى. ولاي دەيتىنىمىز بۇل ءتورت جىل بۇرىن بولعان كورسەتكىشكە قاراعاندا، ەكى مەدالعا ارتىق.

2010- جىلى تۇڭعىش رەت سينگاپۋردە وتكەن جاسوسپىرىمدەر اراسىنداعى وليمپيادا ويىندارىندا قازاقستان قۇراماسى التى مەدال (2 التىن، 2 كۇمىس، 2 قولا) ولجالاپ، جالپى كوماندالىق ەسەپتە 24- ورىنعا تۇراقتاعان ەدى.

وسىعان دەيىن حابارلاعانىمىزداي نانكيندە جارىستىڭ العاشقى كۇنى دزيۋدودان 55 كەلى سالماقتا ەل نامىسىن قورعاعان ساڭلاعىمىز باۋىرجان جاۋىنتايەۆ قازاقستان قورجىنىنا العاشقى التىن مەدالدى سالعان بولاتىن. ال ەكىنشى باس جۇلدەنى التىن جۇدىرىقتى باۋىرىمىز ابىلايحان ءجۇسىپوۆ جەڭىپ الدى. 60 كەلىدە فينالعا دەيىن سۇرىنبەي جەتكەن جەرلەسىمىز شەشۋشى سىندا دا شىن شەبەر ەكەنىن دالەلدەدى. ءجۇسىپوۆ فينالدا كۋبالىق الاين ليمونتامەن كەزدەسىپ، 2:1 ەسەبىمەن جەڭىسكە جەتتى. ءبىرىنشى راۋندتان باستاپ شابۋىلدا ونەر كورسەتۋ جۇيەسىن ۇستانعان جەرلەسىمىز بەلسەندى قيمىلدادى. قارسىلاسىنا سوققىلارىن ءدوپ تيدىرە ءبىلدى. الايدا ەكىنشى راۋندتا كۋبالىق بوكسشى دا وسال ەمەس ەكەنىن تانىتتى. قاتارىنان سىلتەگەن بىرنەشە سوققىسى قارسىلاس ەنشىسىنە ۇپاي جازدى. ءۇشىنشى راۋندتا قورعانىستى دا باسا نازارعا الىپ، ۇرىمتال تۇسىن كۇتكەن ابىلايحان قارسىلاسىنان ايلاسىن اسىرىپ كەتتى.

ەستەرىڭىزگە سالا كەتەيىك، ابىلايحانعا جاسوسپىرىمدەر اراسىنداعى Ⅱجازعى وليمپيادا ويىندارىندا قازاقستان تۋىن ۇستاپ شىعۋدى سەنىپ تاپسىرىلعان بولاتىن. مىنە، جاس بوكسشىمىز سول ارقالاپ بارعان ءۇمىتتى اقتاپ، قاسقايىپ تۋىمىزدى كوتەرىپ شىعىپ، اسپان استى ەلىندە ءانۇرانىمىزدى اۋەلەتە شىرقاتىپ قايتتى.

جەڭىس تۇعىرىنىڭ ەڭ بيىك ساتىسىنا كوتەرىلگەن ءۇشىنشى جەرلەسىمىز - ەركىن كۇرەستەن ەل نامىسىن قورعاعان مۇحامبەت قۋاتبەك. ول 54 كەلى سالماقتا باق سىناپ، ءوزىنىڭ تەڭدەسسىز مىقتىلىعىن الەم الدىندا پاش ەتتى. فينالدا مۇحامبەت امەريكالىق داتون فيكستى جەڭدى. العاشقى مينۋتتاردان ايلاسىن اسىرۋعا تىرىسقان ول ءبىرىنشى كەزەڭدە التى ۇپايعا يە بولدى. امەريكالىق سپورتشى دا ۇپاي ايىرماسىن قىسقارتۋعا ۇمتىلدى. الايدا، قازاقتىڭ قايسار ۇلىنا شاماسى جەتپەدى. وسىلايشا مۇحامبەت قۋاتبەك قازاقستان قورجىنىنا ءۇشىنشى التىن جۇلدەنى سىيلادى.

قازاقستان قورجىنىنا تۇسكەن جالعىز كۇمىس جۇلدەنى 81 كەلىدە جۇدىرىقتاسقان وتانداسىمىز ۆاديم كازاكوۆ جەڭىپ الدى. ول شيرەك فينالدا نورۆەگيالىق ۆەگار ترەگەندى اياماي سوققىنىڭ استىنا الدى. كەزدەسۋ بارىسىندا كازاكوۆتىڭ قارسىلاسىنىڭ قاباعى جارىلىپ، بىرنەشە رەت دارىگەرلەر كومەگىنە جۇگىندى. ال نارەك ماناسيانمەن وتكەن جارتىلاي فينالدىق كەزدەسۋ كازاكوۆ ءۇشىن قيىن بولدى. دەگەنمەن، اسا تارتىستى وتكەن ماتچ ءبىزدىڭ جىگىتتىڭ پايداسىنا شەشىلدى. ەسەپ: - 2:1. ءبىراق ۆاديم كازاكوۆ فينالدا بولگاريالىق قارسىلاسى بلاگو نايدانوۆتان ۇتىلىپ، كۇمىس جۇلدەنى قاناعات تۇتتى.

وسىلايشا، قازاقستان بوكسشىلارى نانكيننەن ءبىر التىن، ءبىر كۇمىس الدى.

ەندى قورجىنىمىزعا قولا مەدال سالعان ساڭلاقتارىمىزعا توقتالىپ وتسەك. العاشقى قولا مەدالعا 77 كەلى سالماقتا سىنعا تۇسكەن اۋىر اتلەتشىمىز جاسۇلان قاليەۆ قول جەتكىزدى. ول جۇلقا كوتەرۋدە ءۇش مۇمكىندىگىن دە پايدالانىپ، 139 كەلىنى باعىندىردى. ال سەرپە كوتەرۋدە دە ءۇش مۇمكىندىگىن ءمۇلت جىبەرمەي، 171 كەلىنى ەركىن باعىندىردى. قوسسايىس قورىتىندىسى بويىنشا 310 كەلىنى كوتەرگەن قازاق سپورتشىسى ءۇشىنشى ورىنعا تابان تىرەدى. التىندى ارمەنيالىق ناكوب مكرتچيان (319 كەلى)، كۇمىستى ءۇندىستاندىق راحۋل راگالا (316 كەلى) يەلەندى. جەرلەسىمىز چەمپيوننان 9 كەلى كەم كوتەردى.

ەكىنشى قولا مەدالعا اۋىر اتلەتيكادان سىنعا تۇسكەن ارۋلارىمىزدىڭ ءبىرى قول جەتكىزدى. وعان 63 كەلىدە باق سىناعان تاتيانا كاپۋستينا يە بولدى. كاپۋستينا قوسسايىس قورىتىندىسى بويىنشا 228 (جۇلقا كوتەرۋدە - 105، سەرپە كوتەرۋدە - 123) كەلىنى باعىندىردى. كۇمىس العان رەسەيلىك سۆەتلانا چەرباكوۆا دا 128 كەلىنى كوتەرگەن. ءبىراق ونىڭ سالماعى كاپۋستينادان از بولىپ، كۇمىس مەدال رەسەيىلىكتىڭ قانجىعاسىنا بايلاندى. التىندى 244 كەلىنى ەركىن كوتەرگەن تايلاندتىق چايدي دۋانگانسورن يەلەندى.

سونداي- اق، زىلتەمىرشىلەرىمىز اراسىنان 69 كەلىدە باق سىناعان ماكەيەۆ جۇلدەلى ورىنعا ءبىر تابان جەتپەي قالعانىن دا ايتا كەتۋىمىز كەرەك. ول قولا جۇلدەنى يەلەنۋگە بارىنشا تالپىنىپ كوردى. جۇلقا كوتەرۋدەن 125 كەلىنى باعىندىرسا، سەرپە كوتەرۋدەن 153 كەلىنى باعىندىرىپ، 4- ورىنعا تابان تىرەدى . سونىمەن قاتار اۋىر اتلەتيكادان سىنعا تۇسكەن ارۋلارىمىزدان 58 كەلىدە سىنعا تۇسكەن التىناي دامەن دە جۇلدەلى ورىنعا ءبىر تابان جاقىنداپ، قارسىلاستارىنا ەسە جىبەرىپ الدى. ونىڭ كورسەتكىشى 5- ورىن.

ءۇشىنشى قولا جۇلدەنى ەل قورجىنىنا گرەك-ريم كۇرەسىنەن سىنعا تۇسكەن ەۆگەني پوليۆادوۆ سالدى. 69 كەلىدە بەلدەسكەن بالۋانىمىز ەگيپەتتىك جانە وزبەكستاندىق قارسىلاستارىن الىپ ۇرىپ، جارتىلاي فينالدا ازەربايجاندىق يسلامبەك دادوۆقا ەسە جىبەرىپ الدى. قولا جۇلدە ءۇشىن وتكەن تارتىستا ەۆگەني گەرمانيادان كەلگەن كارەن موسەباحتان باسىم ءتۇستى. ناتيجەسىندە وتانداسىمىز 3- قولا جۇلدەنى يەلەندى. ال 58 كەلىدە باق سىناعان رايىمبەك قۇرمانعالي بەسىنشى ورىندى يەلەندى.

ءتورتىنشى قولا جۇلدەگە، جارىستىڭ سوڭعى كۇنى ونەر كورسەتكەن گيمناسشى ءبۇلدىرشىن قىزدارىمىز قول جەتكىزدى. ولار جارىستىڭ توپتىق جاتتىعۋلارىندا ءۇشىنشى ورىنعا يە بولدى. قىزدارىمىزدىڭ كورسەتكىشى - 25,050 ۇپاي. ايتا كەتەيىك، ىرىكتەۋ كەزىندە ەلىمىزدىڭ گيمناسشى قىزدارى ءتورتىنشى ورىندا بولعان. الايدا فينالدا ولار وزبەكستان، كانادا، ەگيپەت قۇراماسىن باسىپ وزىپ، قولا جۇلدەنى جۇلىپ الدى. ءامينا قوجاحمەت، ءاليا مولداحمەتوۆا، ۆيكتوريا گۋسلياكوۆا، داريا مەدۆەديەۆا جانە نۇراي قۇماروۆا باستاعان ءبۇلدىرشىن قىزدارىمىز ءتورتىنشى قولا مەدالدى جەڭىپ الىپ، جاسوسپىرىمدەر اراسىنداعى وليمپيادا تاريحىندا العاش رەت جەڭىس تۇعىرىنا كوتەرىلدى. سايىستىڭ بۇل تۇرىنەن ءبىرىنشى ورىندا - رەسەي، ەكىنشى ورىندى بولگاريا قىزدارى يەلەندى.

مىنە، وسىلايشا قازاقستان قۇراماسى نانكيندەگى وليمپيادادا ءۇش التىن، ءبىر كۇمىس، ءتورت قولا مەدال يەلەنىپ، جالپى ەسەپتە 21- ورىنعا تابان تىرەدى. بۇگىن نانكيندە جاسوسپىرىمدەر اراسىنداعى Ⅱجازعى وليمپيادا ويىندارىن جابىلۋ سالتاناتى وتەدى.

ەستەرىڭىزگە سالا كەتەيىك، جالپى، قىتايدىڭ نانكين قالاسىندا جاسوسپىرىمدەر اراسىنداعى Ⅱجازعى وليمپيادا ويىندارىندا 14 پەن 18 جاس اراسىنداعى 3800 ءجاسوسپىرىم سپورتشى باعىن سىنادى. نەگىزىنەن جاسوسپىرىمدەر اراسىنداعى وليمپيادا ويىندارىندا جەكەلەي سىنداعى سپورت تۇرلەرىندە ءار ەلگە بەس جولدامادان ارتىق بەرىلمەيدى. اتالمىش دودادا ەلىمىزدىڭ نامىسىن 21 سپورت تۇرىنەن 51 سپورتشى قورعادى. ال 2010- جىلى سينگاپۋردە وتكەن جاسوسپىرىمدەر اراسىنداعى ءى جازعى وليمپيادا ويىندارىندا ەلىمىزدىڭ اتىنان 47 سپورتشى بارىپ، 20 سپورت تۇرىنەن سىنعا تۇسكەن بولاتىن.

قازاقستان سپورتشىلارى ونەر كورسەتكەن سپورت تۇرلەرى مەن جولدامالار سانى تومەندەگىدەي:

بوكس - 4 جولداما (4 مۇمكىندىكتەن)؛

كۇرەس تۇرلەرى - 4 جولداما (5 مۇمكىندىكتەن)؛

اۋىر اتلەتيكا - 4 جولداما (مۇمكىندىكتەن)؛

ءجۇزۋ سپورتى - 3 جولداما؛

ۆەلوسپورت - 2 جولداما؛

قازىرگى بەسسايىس - 2 جولداما؛

ۇستەل تەننيسى - 2 جولداما؛

ساداق تارتۋ - 1 جولداما؛

نىسانا كوزدەۋ - 1 جولداما؛

اۆتور كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى