شالقار جولامانوۆ، «قازاقستان بارىسى-2012» تۋرنيرىنىڭ كۇمىس جۇلدەگەرى: شاھار مەن اۋىل بالاسىنىڭ ايىرماشىلىعى جەر مەن كوكتەي
وسى ءبىر شاعىن اۋىل كۇرەس ونەرىنىڭ تالاي ءدۇلدۇلىن تاربيەلەپ شىعاردى. سولاردىڭ ءبىرى - قازاق كۇرەسىنىڭ بەلدى وكىلى شالقار جولامانوۆ.
ماقانشىلىق جىگىتتىڭ ايتۋىنشا، بۇل ءۇردىس جالعاسىن تابا بەرمەك. ويتكەنى اۋىلدىڭ بۇگىنگى جاستارىنا سپورتپەن شۇعىلدانۋعا تولىق جاعداي جاسالعان.
- ءار ادامعا ءوزىنىڭ كىندىك قانى تامعان جەرى ىستىق دەپ جاتامىز. ءسىز تۋعان اۋىلىڭىزعا قانشالىقتى ءجيى بارىپ تۇراسىز؟
- ءوزىم شىعىس قازاقستان وبلىسىنداعى ءۇرجار اۋدانىنىڭ ماقانشى اۋىلىندا تۋىپ-ءوستىم. سپورتشى بولعاندىقتان جارىس-جيىن دەپ ءجۇرىپ دەمالۋعا ۋاقىت تا بولا بەرمەيتىن. ءبىراق 2-3 كۇن دەمالۋعا مۇمكىندىك بولا قالسا، تۋعان جەرگە قاراي تارتىپ كەتەتىنبىز.
ءوزىڭىز دە بىلەسىز، ءۇرجار - تابيعاتى كوز تويماس ەرەكشە ءوڭىر. تاۋى بار، ار جاعىندا الاكول تۇر. تازا اۋاسىمەن تىنىستاۋدىڭ ءوزى ءبىر عانيبەت. اعارعان ءىشىپ، قالاعا بويعا كۇش جيناپ كەلەسىڭ. قازىر ەندى جۇمىستا بولعان سوڭ، ءارى-بەرى شاپقىلاي بەرۋدىڭ ءساتى تۇسە بەرمەيدى. دەگەنمەن دەمالىستى مىندەتتى تۇردە ماقانشىدا وتكىزەمىز. بالالار دا جازدىڭ ءۇش ايىندا اۋىلدا بولىپ، اتا-اجەلەرىنە كومەكتەسەدى. قالادا قايبىر ءومىر دەيسىڭ، ءتۇرلى جاعدايدى ەستىپ اۋلاعا شىعارۋعا دا قورقاسىڭ. اينالىپ كەلگەندە، ءتورت قابىرعاعا قاراپ وتىرادى. جۇگىرىپ ويناماعان سوڭ، شىنىقپاعان سوڭ، قانداي بالالىق شاق ول؟! شاھار مەن اۋىل بالاسىنىڭ ايىرماشىلىعى جەر مەن كوكتەي بولاتىندىعى دا سوندىقتان.
- بۇگىنگە دەيىن تۋعان جەرىڭىزگە قانداي دا ءبىر كومەگىڭىز ءتيدى مە؟
- سپورتشى بولعاندىقتان الدىمەن تۇرعىنداردىڭ، اسىرەسە، جاستاردىڭ سپورتقا قىزىعىپ وسكەنىن قالايمىز. سپورتتىڭ پايداسىن بىلگەندىكتەن دە عوي. شاما-شارقىمىز جەتكەنشە، از-كەم قولعابىس جاساپ تۇرامىز. تۇلەكتەر جينالىپ جاساندى ستاديون سالىپ، وعان قاجەتتى قۇرال-جابدىقتاردى الىپ بەردىك. ودان قالدى فۋتبول، كۇرەس، توعىزقۇمالاق سەكىلدى سپورتتىڭ بىرنەشە تۇرىمەن قاتار شۇعىلدانۋعا مۇمكىندىك بەرەتىن «ءتۇز قىراندارى» سپورت مەكتەبىن اشتىق. سونى كوپتەن بەرى ارمانداپ جۇرگەنمىن. ايتەۋىر ماقانشىلىق بوتا شارمۇحانوۆ سەكىلدى جەرگىلىكتى بيزنەسمەندەردىڭ قولداۋىمەن سول جوسپاردى جۇزەگە اسىردىق. بوس سەندەلگەن بالا جامان جولعا ءتۇسىپ كەتۋى مۇمكىن. ءبىزدىڭ ورتاق ماقسات - سونىڭ الدىن الۋ.
بالالاردى تۋرا جولعا باعىتتاپ، پايدالى ءىستى كورسەتۋ. قۇدايعا شۇكىر، ويىمىزداعى بىرتە-بىرتە ورىندالىپ كەلە جاتقان سىڭايلى. اۋداندى بىلاي قويعاندا، ءبىر عانا ماقانشىنىڭ وزىنەن تالاي تانىمال بالۋان شىقتى. ەندى ىنىلەرىمىز، جاستار اعالارىنىڭ ءىزىن قۋادى دەگەن سەنىمدەمىز.
- ءسىز كەتكەلى اۋىلىڭىز قانشالىقتى وزگەردى؟
- ءبىز سپورتقا دەن قويعاندا، ارنايى جاتتىعۋ زالدارى دەگەن بولعان جوق. مەكتەپتە نەمەسە مادەنيەت ۇيىندە دايىندالاتىنبىز. ونىڭ ءىشى سالقىن. باپكەرلەر ۇنەمى «وتىرماڭدار، اۋىرىپ قالاسىڭدار، جۇگىرىڭدەر، قيمىلداڭدار» دەپ ايتاتىن. ال بۇگىندە تۇرعىنداردىڭ دا، بالالاردىڭ دا سالاماتتى ءومىر سالتىن ۇستانۋىنا، سپورتپەن اينالىسۋىنا بارلىق جاعداي بار. الگىندە اتاپ وتكەنىمدەي، دارىندى سپورتشىلارمەن قاتار كاسىبىن ءتاپ-ءتاۋىر دوڭگەلەتىپ وتىرعان اعالارىمىز دا از ەمەس.
سول كىسىلەر دە اۋىلدى ۇمىتپاي، كومەكتەسىپ، تۇرعىنداردىڭ جاعدايى اناعۇرلىم جاقسارعان. اۋىلدا ەگىن، مال شارۋاشىلىقتارىمەن قاتار، قىتايمەن شەكارادا تۇرعاندىقتان، ساۋدا-ساتتىق دا دامىعان.
«Sport»
سۋرەت «قازاقستان بارىسى» سايتىنان الىندى
