تۇركيا قازاقستاننىڭ اگروونەركاسىپ كەشەنىنە 200 ميلليون دوللار ينۆەستيتسيا سالادى

بۇل تۋرالى ق ر اۋىل شارۋاشىلىعى ءمينيسترى ەربول قاراشوكەيەۆ ايتتى، دەپ حابارلايدى قازاقپارات ءتىلشىسى.

«تۇركيامەن قارىم-قاتىناسىمىز وتە جوعارى دەڭگەيدە. وسى جىلدىڭ جەتى ايىنىڭ قورىتىندىسىندا ەكسپورت پەن يمپورت اينالىمى ەكى ەسە ءوسىپ وتىر. قازاقستاننىڭ ەكسپورتى ەكى ەسە، ال تۇركيادان كەلەتىن يمپورتتىڭ كولەمى 60 پايىزعا ارتتى. قازىرگى تاڭدا ساۋدا ديناميكاسى جوعارى دەڭگەيگە جەتتى. بۇگىنگى تۇركيا وكىلدەرىمەن كەزدەسۋدە ازىرلەنگەن دايىن زاڭنامالارىمىز تولىقتاي قامتىلعان»، - دەدى مينيستر اقوردادا ب ا ق وكىلدەرىنىڭ ساۋالىنا وراي.

ونىڭ اتاپ وتۋىنشە، تۇركيا قازاقستاندا 5 ءىرى جوبانى ىسكە اسىرۋدى جوسپارلاپ وتىر.

«تۇرىك ينۆەستورلارى اگروونەركاسىپ كەشەنىمىزگە ينۆەستيتسيا سالۋعا نيەتتى. ونىڭ ىشىندە ءىرى-ءىرى بىرنەشە جوبا بار. 200 ميلليون دوللاردان استام ينۆەستيتسيا كۇتىپ وتىرمىز. ولاردىڭ اراسىندا تەرى وڭدەۋ، باق ءوسىرۋ سىندى جوبالار بار. اۋىل شارۋاشىلىعى مينيسترلىگى ولارعا قولداۋ كورسەتەدى. جۇيەلى جۇمىس ىستەيمىز دەگەن سەنىمدەمىن»، - دەدى ەربول قاراشوكەيەۆ.

ەسكە سالا كەتەيىك، بۇگىن مەملەكەت باسشىسى قاسىم-جومارت توقايەۆ قازاقستانعا مەملەكەتتىك ساپارمەن كەلگەن تۇركيا رەسپۋبليكاسىنىڭ پرەزيدەنتى رەجەپ تايپ ەردوعاندى ەلوردا اۋەجايىندا كۇتىپ الدى.

قازىرگى ۋاقىتتا اقوردادا مەملەكەت باسشىلارىنىڭ كەزدەسۋى ءوتىپ جاتىر.

ەستەرىڭىزگە سالا كەتەيىك، رەجەپ تايپ ەردوعان ەلىمىزگە ەكى كۇندىك مەملەكەتتىك ساپارى اياسىندا قازاقستان پرەزيدەنتىمەن ەكىجاقتى كەزدەسۋ وتكىزىپ، قازاقستان مەن تۇركيا اراسىنداعى جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ 4- وتىرىسىنا قاتىسادى.

كەلىسسوز بارىسىندا وزەكتى وڭىرلىك جانە حالىقارالىق ماسەلەلەر بويىنشا پىكىر الماسىپ، تاراپتار ەكىجاقتى ينۆەستيتسيالىق جانە ساۋدا-ەكونوميكالىق ىنتىماقتاستىقتىڭ پەرسپەكتيۆالارىن تالقىلايدى.

سونىمەن بىرگە، تۇركيا رەسپۋبليكاسىنىڭ باسشىسى ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ VI سامميتىنە دە قاتىسادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى