ەلوردادا 200 دەن اسا ءۇي اپاتتى جاعدايدا تۇر - التاي كولگىنوۆ
«قالامىزدا اپاتتى كۇيدە تۇرعان 200 دەن اسا ءۇي بار. سوڭعى ءۇش جىلدا مۇنداي ۇيلەردەن 700 گە جۋىق وتباسى كوشىرىلدى. بيىل تاعى 300 دەن استام وتباسىنى كوشىرۋدى جوسپارلاپ وتىرمىز. ەلوردا دامۋ باعدارلاماسى جۇزەگە اسىرىلعالى بەرى اپاتتى ۇيلەردەن 4 مىڭ 200 وتباسى كوشىرىلدى. بۇدان بولەك تۇرعىن ءۇي كەشەندەرىن جوندەۋ جانە قاۋىپتى ليفتىلەردى اۋىستىرۋ جۇمىسى قولعا الىندى. ماسەلەن، كۇيشى دينا كوشەسى بويىندا ورنالاسقان ۇيلەردىڭ يەلەرىن قابىلداۋ بارىسىندا ليفتىلەردى اۋىستىرۋ ماسەلەسى كوتەرىلدى. بۇل ۇيدەگى ليفتىلەردىڭ ءبىر بولىگى اۋىستىرىلدى، قالعان بولىگىن جاڭارتۋ جۇمىسى ءجۇرىپ جاتىر. وسىعان دەيىن 80 ءليفتى جاڭارتىلدى، بيىل تاعى 40 عا جۋىق جەدەلساتىنى جاڭارتۋدى جوسپارلاپ وتىرمىز. كەلەر جىلعى جوسپارعا ازىرگە 30 ليفتى ەندى، ءتىزىمدى تولىقتىرۋ جۇمىسى ءجۇرىپ جاتىر»، - دەپ جازدى باس شاھاردىڭ اكىمى.
ايتا كەتەيىك، بۇل ۋاقىتقا دەيىن التاي كولگىنوۆ ەلورداداعى تۇرعىن ءۇي قۇرىلىسىنىڭ قارقىنىن باسەڭدەتۋدى ۇسىنعان بولاتىن.
ونىڭ ايتۋىنشا، قۇزىرلى ورگاندار جاڭا باسپانالارعا قاجەتتى ينجەنەرلىك جەلىلەرمەن قامتاماسىز ەتىپ ۇلگەرمەي جاتىر.
