استانالىقتار ارىس تۇرعىندارىنا 200 ميلليون تەڭگە اۋداردى
«مەملەكەت باسشىسىنىڭ تاپسىرماسىمەن ارىس قالاسىنىڭ تۇرعىندارىنا كومەك كورسەتۋ جانە قالانى قالپىنا كەلتىرۋ بويىنشا ءبىرقاتار جۇمىس جۇرگىزىلىپ جاتىر. قالا اكىمىنىڭ ورىنباسارى نۇرلان نۇركەنوۆ قۇرىلىس بريگادالارىمەن بىرگە ارىس قالاسىنا بارادى. تۇركىستاندىق ارىپتەستەرمەن بىرگە تۇرعىن ۇيلەر مەن باسقا دا ينفراقۇرىلىم وبەكتىلەرىن قالپىنا كەلتىرۋ جۇمىستارىن باستايدى. ول جەردە ءبىزدىڭ شاتىر-لاگەرلەرىمىز بولادى»، - دەپ جازدى ەلوردا اكىمى الەۋمەتتىك جەلىدەگى پاراقشاسىنا.
سونىمەن بىرگە، اكىم ارىس قالاسىنىڭ زارداپ شەككەن تۇرعىندارىنا ءبىر كۇندىك جالاقىسىن اۋدارىپ، قولداۋ كورسەتكەن قىزمەتكەرگە جانە قالا تۇرعىندارىنا العىس ءبىلدىردى.
بۇگىنگە دەيىن مەملەكەتتىك ورگانداردىڭ، قالالىق مەكەمەلەر مەن كاسىپورىنداردىڭ قىزمەتكەرلەرى ارىس تۇرعىندارىنا جالپى سوماسى 200 ميلليون تەڭگە اۋداردى.
ازاماتتار تاراپىنان ارىستىقتارعا كومەك رەتىندە «نۇرلى-استانا» قورىنا ءالى دە قارجى اۋدارۋ جالعاسۋدا. ارىس قالاسىنىڭ 500 گە جۋىق بالاسىنىڭ جازعى دەمالىسىن استانادا وتكىزۋدى قولعا الدىق. ولارعا قالامىزدىڭ كورىكتى جەرلەرى بويىنشا ەكسكۋرسيالار، مەرەكەلىك كونسەرتتەر ۇيىمداستىرىلادى.
بۇل شارالار 1- شىلەدەدەن باستالادى. ەۋرازيالىق ۇلتتىق ۋنيۆەرسيتەتى بالالاردى جاتىن ورىنمەن قامتاماسىز ەتىپ، جاتاقحانالارىن ۇسىنىپ وتىر. سونىمەن بىرگە، بالالارعا قاجەتتى زاتتار، كيىم، مەكتەپ قۇرال-جابدىقتارى سىيلانادى.
«حالىقتىڭ بىرلىگى وسىنداي قيىن ساتتەردە تانىلادى. ەلىمىزدىڭ ءاربىر ازاماتى ارىس قالاسىنىڭ تۇرعىندارىنا الاڭداۋشىلىق ءبىلدىرىپ وتىر. استانالىقتار دا زارداپ شەككەندەرگە كومەك كورسەتۋدەن شەت قالمايدى»، - دەيدى التاي كولگىنوۆ.
