قارقارالىدا 200-گە جۋىق بۇلاقتىڭ كوزى اشىلدى
ءار كوكتەمدە وتكىزىلىپ تۇراتىن تاعىلىمدى شاراعا اۋىل اقساقالدارى، جاستار جاپپاي قاتىستى. مامانداردىڭ ايتۋىنشا، قارقارالىداعى 112 مىڭ گەكتار اۋماقتى الىپ جاتقان نۋ ورماندا وسىمدىكتىڭ 700-دەن استام ءتۇرى وسەدى ەكەن جانە اڭ- قۇستىڭ 190 ءتۇرى مەكەندەيدى. «ماقساتىمىز - تابيعاتتىڭ وسى بايلىعىن ساقتاپ قالۋ»، - دەيدى جەرگىلىكتى جۇرت.
سوڭعى جىلدارى يگى جۇمىسقا ەرىكتى تۇردە قاتىساتىن بەلسەندى جاستاردىڭ قاتارى ارتىپ كەلەدى. بيىل دا مەكتەپ وقۋشىلارى ءبىر كىسىدەي ورمانعا بەت تۇزەپ، قۇستىڭ ۇياسىن ورناتتى، قىستان قالعان كۇل- قوقىستى جينادى.
سونىمەن قاتار، ورماننىڭ سانيتارى سانالاتىن قۇمىرسقانىڭ يلەۋىن قورشاۋعا الىپ، ماڭايىن تازالادى.
«ءاز- ناۋرىزىمىز كەلدى. وسىعان بايلانىستى قازاقتا كوپتەگەن جورالعىلار بار. سونىڭ ءبىرى - بۇلاقتىڭ كوزىن اشۋ. بۇلاقتان بۇكىل تىرشىلىك ءنار الادى عوي. ۇلكەندەر كەلەشەك جاستارعا ۇلگى بولۋ ءۇشىن وسى ءداستۇردى جالعاستىرىپ كەلەمىز»، - دەدى قارقارالى قالاسىنىڭ تۇرعىنى تىلەك ءسادۋاقاسوۆ.
