اقتوبەدە جالاقىسى 200 مىڭ تەڭگە بولاتىن جۇمىسقا مامان تابىلماي تۇر

اقتوبە وبلىسىندا بيىل 42 مىڭنان استام ادامدى جۇمىسپەن قامتۋ جوسپاردا بار. شاعىن نەسيە الۋشىلارعا 2,2 ميلليارد تەڭگە قاراستىرىلىپ وتىر. كوبىنە اۋىل ادامدارى مال الىپ، ونى باعىپ، وسىرەدى.

«اۋىل حالقى مال ساتىپ الادى. كەيدە نەسيەمەن شارۋاشىلىق جۇمىسىن باستاپ، ءوز اۋىلداستارىن ەڭبەكپەن قامتاماسىز ەتەدى. ءبىز ءۇشىن جۇمىسسىز ادامداردى بيزنەسكە تارتۋ جانە جاڭا جۇمىس ورىندارىن اشۋ ماڭىزدى. بيىل دا وتكەن جىلعى قارجى ساقتالىپ، 2,2 ميلليارد تەڭگە قاراستىرىلدى. ازىرگە، نەسيە الىپ، ونى قايتارا الماي وتىرعان بەرەجاق ادامدار جوق. وتكەن جىلى نەسيە العان 100 دەن استام ادام 352 ميلليون تەڭگەنى بەردى»، - دەدى اقتوبە وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى قايرات وتاروۆ.

جوسپار بويىنشا بيىل 3 مىڭنان استام ادام تەحنيكالىق-كاسىپتىك، قىسقا مەرزىمدى كۋرستاردا بىلىكتىلىگىن جەتىلدىرىپ، ماماندىق الادى. ال 2231 ادام «باستاۋ-بيزنەس» جوباسى اياسىندا قارجىلىق ساۋاتتىلىقتارىن ارتتىرادى. قازىرگى كەزدە اقتوبە وبلىسى ءۇشىن جول سالۋ جۇمىستارىنا قاجەتتى ماماندار قاجەت بولىپ تۇر. جالاقىسى 200 مىڭ تەڭگە بولاتىن جۇمىسقا ساي كەلەتىن كادر از.

«بيىل اقتوبە-اتىراۋ تاسجولىنىڭ قۇرىلىسى باستالادى. «قازاۆتوجول» مەكەمەسى ءىرى تاسجولداردىڭ قۇرىلىسى كەزىندە ارنايى كولىكتەردى جۇرگىزەتىن مامانداردىڭ جوق ەكەنىن ايتتى. وتكەن جىلى كاسىپورىندار اياسىندا وقۋ ورتالىعىن اشىپ، ءتورت كاسىپكەر وسى ءىستى قولعا العان بولاتىن. جول سالۋ كەزىندە دە وسى ءادىستى پايدالانىپ، جۇمىسسىز ادامداردى قىسقا مەرزىمدى كۋرستارعا جىبەرەمىز. قازىرگى كەزدە مەردىگەر كومپانيالار 600 گە جۋىق جۇمىس ورىن اشىلاتىنىن ايتتى. الدىمەن جول سالىناتىن اۋدان تۇرعىندارىن وقىتامىز. اسپازداردىڭ دا سول اۋىلدان الىنعانىن قالايمىز. جەتپەسە وبلىس ورتالىعىنداعى جۇمىسسىزدار جىبەرىلەدى»، - دەدى قايرات وتاروۆ.

اۆتور: التىناي ساعىندىقوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى