پاۆلودار وبلىسىندا اسىق اتۋ ۇيىرمەلەرىنىڭ سانى 200 گە جۋىقتادى
بىلتىرعى جىلى مۇنداي ۇيىرمە سانى 93 بولعان، دەپ حابارلايدى pavlodarnews.
«جوبا ماسشتابتى سيپاتتى يەلەنىپ، وقۋشىلار مەن ەرەسەكتەر اراسىندا ۇلكەن قىزىعۋشىلىق تۋدىردى. وقۋشىلار جاز كەزىندە اسىق جيناپ، اتالمىش جوبانى ىسكە اسىرۋ ءوڭىردىڭ جالپى ءبىلىم بەرەتىن مەكتەپتەرىندە قولعا الىندى. سونىمەن قاتار، جوبانى ەنگىزۋگە مەكتەپكە دەيىنگى مەكەمەلەر دە بەلسەندى قاتىسقان.
بۇگىنگى كۇنى «اسىق party» اكسياسى پاۆلودار قالاسى، كاچير، لەبياجى جانە اقتوعاي اۋداندارىنىڭ بالاباقشالارىندا ۇيىمداستىرىلعان. مەكتەپكە دەيىنگى ۇيىم تاربيەشىلەرى تاربيەلەنۋشىلەردىڭ ۇلتتىق ويىنعا اسا قىزىعۋشىلىق تانىتقاندارىن ايتۋدا»، - دەيدى وبلىستىق ءبىلىم بەرۋ باسقارماسى قوسىمشا ءبىلىم بەرۋ جانە تاربيە جۇمىسى جونىندەگى ءبولىمىنىڭ باس مامانى قۋانىش قىدىرالين.
باس ماماننىڭ ايتۋىنشا، ۇيىرمەلەردەگى وقۋشىلار سانى 1950 دەن 3477 گە دەيىن ارتقان. اعىمداعى جىلى العاش رەت «اسىق اتۋ» ويىنى بويىنشا وبلىستىق جارىستار ۇيىمداستىرىلىپ، جەلتوقساننىڭ ءبىرىنشى ون كۇندىگىندە بارلىق ءبىلىم بەرۋ ۇيىمدارىندا مەكتەپتتىك تۋرنيرلەر، جاتتىقتىرۋشى مۇعالىمدەر ءۇشىن سپورتتىڭ اتالعان ءتۇرىن وقىتۋ جانە شەبەرلىكتەرىن ارتتىرۋ بويىنشا سەمينار- پراكتيكۋم ءوتتى. جەكە جانە كوماندالىق ەسەپتە جەڭىمپازدار انىقتالدى.
جوبانىڭ ماقساتى «اسىق اتۋ» مەكتەپ ليگاسىن ۇيىمداستىرۋ، سپورتتىڭ اتالعان ءتۇرىن 2020 -جىلى وقۋشىلاردىڭ وبلىستىق سپارتاكياداسىنىڭ باعدارلاماسىنا ەنگىزۋ بولىپ تابىلادى.
