اقتوبەنىڭ اكىمدىگى دالادا قالعان 200 دەن استام ادامنىڭ تەك ەكەۋىنە كومەكتەسپەك
بۇل جاعدايدى جەرگىلىكتى اكىمدىك بىلەدى. ءبىراق جەكەنىڭ قولىنداعى جاتاقحانا ماسەلەسىنە حرومتاۋ اۋداندىق اكىمدىگى ارالاسپاۋدى ءجون كورگەن جوق، دەپ حابارلايدى قازاقپارات ءتىلشىسى.
ءدوڭ كەن بايىتۋ كومبيناتىنا تيەسىلى جاتاقحاناعا قونىستانعان اقتوبە وبلىسى، حرومتاۋ اۋدانىنىڭ تۇرعىندارىنا جەرگىلىكتى اكىمدىك كومەكتەسە المايدى. «جاتاقحانا ءدوڭ كەن بايىتۋ كومبيناتىنا تيەسىلى. عيمارات ەسكى. ءدوڭ كەن بايىتۋ كومبيناتى بىرنەشە مارتە ساراپتاما وتكىزىپ، ناتيجەسىندە اپاتتى دەپ تانىلدى. سول قورىتىندىعا بايلانىستى حروميت، سپورت قوناق ۇيىنە ورنالاستىرۋعا كەلىسىمگە كەلدى. جۇمىسشىلاردىڭ كوبى كومبيناتتا جۇمىس ىستەيدى. ءمالىم بولعانى، 3 بالاسى بار وتباسى ءبىزدىڭ اكىمدىك ارقىلى جاتاقحاناعا ورنالاستىرىلعان ەكەن. سول وتباسىنى اكىمدىك يەلىگىندەگى پاتەرگە ورنالاستىرامىز»، - دەدى حرومتاۋ اۋدانى اكىمىنىڭ ورىنباسارى سەيتماعامبەت ءشىلمانوۆ.
بۇعان دەيىن حابارلاعانىمىزداي، زەينەتكەرلەر مەن جەتىمدەر، جالعىزباستى انالار مەن كەنشىلەر قونىستانعان جاتاقحانا اپاتتى دەپ تانىلىپ، زاۋىت باسشىلىعى تۇرعىندارعا 1 اي ۋاقىت بەردى. تابىسى از وتباسى مۇشەلەرى پاتەردەن شىعۋدان باس تارتىپ وتىر. ولار دالادا تۇنەپ، كۇركەدە كۇنەلتۋگە بەكىنىپ وتىر.
كەيبىرى «بالالارىمدى باعا الماي، جەتىمدەر ۇيىنە وتكىزەمىن» دەگەن ويعا كەلگەن. اشۋعا بۋلىققان تۇرعىندار ءوز-ءوزىن ورتەپ جىبەرۋ تۋرالى ايتتى.
«بارلىعى 243 ادام جاتاقحانادا تۇرادى. 51 بولمەدە وتباسىلى 163 ادام تۇرىپ جاتىر. سونىمەن قاتار جالعىزباستى 49 ادام بار. ەكى زەينەتكەر دە قونىستانعان. بارىنە اۋدان اكىمدىگى جاۋاپتى. تۇرعىن ءۇي كوميسسياسىنىڭ ءتوراعالىعى اۋدان اكىمشىلىگىندە. حرومتاۋ اۋداندىق قارجى ءبولىمى دە جاۋاپتى. جاتاقحانا قالادا ورنالاسقانىمەن، ءبارى اۋدان اكىمدىگىنەن كومەك سۇراپ بارادى. سۇراقتىڭ قالاي شەشىلەتىنىن بىلمەيمىن. جاتاقحانا ءدوڭ كەن بايىتۋ كومبيناتىنا تيەسىلى. ءبارى ءوز جۇمىسشىلارىنا ارنالعان ورىن. سوڭعى جىلدارى ادامدار قونىستانا باستادى. ساراپتاما تۇجىرىمىنا بايلانىستى، جاتاقحانانى پايدالانۋعا بولمايدى. اپاتتى دەپ ايتىلعان سوڭ وتكەن جىلى جوندەۋ جاساۋ تۋرالى ءسوز قوزعالدى. ءبىراق تۇرۋ قاۋىپتى ەكەن. كومبينات 320 ميلليون تەڭگە ءبولىپ، جاڭا جاتاقحانا سالماقشى»، - دەدى حرومتاۋ قالاسىنىڭ اكىمى اسقار نۇرتازين.
