پاكىستاندا اپتاپ ىستىقتان 2000 عا جۋىق ادام قايتىس بولدى
دەگەنمەن اپتاپ سالدارىنان اۋرۋحاناعا تۇسكەندەردىڭ بەتى بەرى قاراماي تۇر.
سوڭعى بىرنەشە كۇندە ىستىقتان شامامەن 900 دەي تۇرعىن كوز جۇمدى.
ال جىل باسىنان بەرى 2 مىڭعا جۋىق ادام مەرت بولعان. ەلدىڭ وڭتۇستىك ايماقتارى مەن ءۇندىستاننىڭ ەڭ ءىرى قالاسى كاراچيدە بىرنەشە كۇننەن بەرى اپتاپ ىستىق باسىلار ەمەس. بۇل ايماقتاردا تەرمومەتر كورسەتكىشى 45 گرادۋستان تومەن تۇسپەي تۇر.
توتەنشە جاعداي مينيسترلىگىنىڭ باسشىسى بۇنداي اپتاپ ىستىق ەكولوگيالىق پروبلەمالاردىڭ اسەرىنەن بولىپ وتىرعانىن ايتتى.
اشگار ناۆاز، توتەنشە جاعداي مينيسترلىگىنىڭ باسشىسى:
- قورشاعان ورتادا بولىپ جاتقان وزگەرىستەردەن پاكىستان ادام ومىرىنە ەڭ قاۋىپتى ەلدەردىڭ قاتارىنا كىرىپ وتىر. بۇگىنگى پروبلەما بولاشاقتا ءالى بىرنەشە رەت قايتالاناتىن بولادى. سوندىقتان ءاردايىم دايىن بولۋىمىز كەرەك. الدىن الا جاسالىناتىن بارلىق شارالاردى قولعا الۋىمىز قاجەت.
اۋرۋحانالاردا ناۋقاستاردى قابىلدايتىن ورىن جوق. دارىگەرلەر تاۋلىك بويى ۇزدىكسىز ەڭبەك ەتۋدە. ءتىپتى ءمايىتحانالاردا دا ورىن تاپشى. ىستىقتىڭ سالدارىنان ەلەكتر جەلىلەرى ىستەن شىققاندىقتان، حالىق سالقىنداتقىشتار مەن جەلدەتكىشتەردى قولدانا الماۋدا. ايماقتا سۋ تاپشىلىعى دا پايدا بولدى.
كاراچي تۇرعىنى:
- حالىق وتە ناشار جاعدايدا ءومىر سۇرەدى. تۇرعىندار اشىق اسپان استىندا تۇنەۋگە ءماجبۇر بولدى. ال دالادا يتتەر مەن مايمىلدار تولىپ ءجۇر. وتە قاۋىپتى. جەرگىلىكتى بيلىك ەش شارا قولدانبادى. ءتيىستى امال جاساۋدىڭ ورنىنا ءۇنسىز وتىرا بەردى.
بۇگىن اۋا تەمپەراتۋراسى 34 گرادۋسقا دەيىن تومەندەدى. دارىگەرلەردىڭ كومەگىنە جۇگىنگەن ادام سانى دا ازايدى. ء«بىراق مۇنىڭ قانشا ۋاقىتقا سوزىلاتىنى بەلگىسىز»، - دەيدى ماماندار. كاراچي تۇرعىنى:
- وتكەن كۇندەرگە قاراعاندا بۇگىن جەڭىلدەپ قالعان سياقتىمىز. تىنىسىمىز تارىلمادى. كۇن بۇلتتانىپ، سامال جەل تۇر. جاقىندا جاۋىن جاۋادى دەپ ۇمىتتەنەمىز.
ايتا كەتەيىك، وتكەن ايدا دا پاكىستان مەن ءۇندىستان شەكاراسىندا بولعان اپتاپ ىستىقتان شامامەن 1500 ادام كوز جۇمعان بولاتىن.
www.24.kz
