20 ميلليونىنشى ادام: اقمولا وبلىسىندا تۋعان بالاعا 2 ميلليون تەڭگەنىڭ سەرتيفيكاتى تابىس ەتىلدى
اقمولا وبلىسىنىڭ بۋراباي اۋدانىندا ەلىمىزدىڭ 20 ميلليونىنشى تۇرعىنى دۇنيەگە كەلدى. ايماق باسشىسى پەرزەنتحاناعا بارىپ، ءسابيدىڭ اتا- اناسىن قۇتتىقتادى، دەپ حابارلايدى Kazinform وبلىس اكىمىنىڭ باسپا ءسوز قىزمەتىنە سىلتەمە جاساپ.
ءسابي دينارا مەن ايدار يسەنوۆتار وتباسىندا دۇنيەگە كەلگەن. دارىگەرلەردىڭ ايتۋىنشا، انانىڭ جۇكتىلىگى قالىپتى وتكەن، قازىرگى ۋاقىتتا نارەستە مەن انانىڭ جاعدايى قاناعاتتانارلىق.
اقمولا وبلىسىنىڭ اكىمى مارات احمەتجانوۆ ەل پرەزيدەنتىنىڭ اتىنان وتباسىن ءسابيدىڭ دۇنيەگە كەلۋىمەن قۇتتىقتادى.
- بۇگىن مەملەكەت باسشىسى قاسىم- جومارت توقايەۆ حالىقتى ەلىمىزدىڭ جيىرما ميلليونىنشى تۇرعىنىنىڭ دۇنيەگە كەلۋىمەن قۇتتىقتادى! وسىناۋ اتاۋلى وقيعاعا ءبىز دە قۋانىشتىمىز. ەلىمىزدىڭ جيىرما ميلليونىنشى تۇرعىنى بولىپ ءومىر ەسىگىن اشقان پەرزەنتتىڭ اقمولا وبلىسىنىڭ ەرەكشە ءبىر كوركەم، كورىكتى، سۇلۋ جەرى بۋرابايدا دۇنيەگە كەلۋى ءبىز ءۇشىن ءتىپتى ەرەكشە سىي! بالا قاي جەردە تۋسا دا، بۇكىل قازاقستان حالقىنىڭ قۋانىشى. مەملەكەت دەنساۋلىق ساقتاۋ مەن بىلىمگە كوپ كوڭىل بولەدى، ءبىزدىڭ بالالارىمىز جاقسى ءبىلىم مەن مەديتسينالىق كومەك الا وتىرىپ، قولايلى ورتادا ءوسۋى كەرەك. بۇل وتانىمىزدىڭ تۇراقتىلىعى مەن وركەندەۋىنىڭ جارقىن ايعاعى"، - دەپ اتاپ ءوتتى مارات احمەتجانوۆ.
جاڭا تۋعان ءسابيدىڭ اتا- اناسى قۋانىشىنا ورتاقتاسقان وبلىس باسشىلىعىنا العىسىن ءبىلدىردى.
"ءبىزدىڭ وتباسىمىز ءۇشىن بۇل كۇتپەگەن جانە وتە قۋانىشتى كۇن! بۇل ءبىزدىڭ ەكىنشى بالامىز! بارشاڭىزعا بەيبىت اسپان تىلەيمىن! ءبىز ءوز تاراپىمىزدان بالالارىمىزدىڭ باقىتتى وتباسىندا جانە بەيبىت مەملەكەتتە وسۋىنە ىقپال ەتەمىز"، - دەدى وتاعاسى ايدار يسەنوۆ.
قازىرگى ۋاقىتتا انا سابيىمەن بىرگە «اۆيتسەننا - بۋراباي» ج ش س انا مەن بالا بولىمشەسىندە جاتىر.
وبلىستا 10 ايدا 9604 بالا دۇنيەگە كەلدى.
