20 ميلليون تەڭگەنىڭ مالىن ۇرلاعان: الماتى وبلىسىندا بارىمتاشىلار ۇستالدى
الماتى. KAZINFORM - الماتى وبلىسىندا شامامەن 20 ميلليون تەڭگەنىڭ مالىن ۇرلاعان بارىمتاشىلار قۇرىقتالدى.
Polisia.kz ءتىڭ مالىمەتىنشە، كريمينالدىق پوليتسيا قىزمەتكەرلەرى پروكۋراتۋرانىڭ ۇيلەستىرۋىمەن مال ۇرلىعىنا قاتىسى بار ءبىر توپ ادامدى قولعا ءتۇسىردى.
جەدەل-ىزدەستىرۋ شارالارى بارىسىندا كۇدىك تۋدىرعان ەكى اۆتوكولىك توقتاتىلىپ، ولاردىڭ جۇكسالعىشىنان ۇرلانعان جەتى باس مال تابىلدى. وقيعا ورنىندا 28 بەن 34 جاس ارالىعىنداعى ءۇش ەر ادام ۇستالىپ، تەرگەۋ جۇرگىزۋ ءۇشىن پوليتسيا بولىمىنە جەتكىزىلدى.
تەكسەرۋ ناتيجەسىندە ولاردىڭ ارەكەتتەرىنەن جامبىل اۋدانى دەگەرەس اۋىلىنىڭ تۇرعىندارى زارداپ شەككەنى انىقتالدى. ۇرلانعان مال يەلەرىنە قايتارىلدى.
تەرگەۋ بارىسىندا ۇستالعانداردىڭ جامبىل جانە كورشىلەس قاراساي اۋداندارىندا جاسالعان ون 15 مال ۇرلىعى دەرەگىنە قاتىسى بارى بەلگىلى بولدى. قۇقىق قورعاۋ ورگاندارى ولاردىڭ قىلمىسقا قاتىسى بار ىقتيمال سىبايلاستارى مەن ۇرلانعان مالدى ساتىپ الۋشىلاردى انىقتاۋ جۇمىستارىن جالعاستىرۋدا.
ازىرگە كەلتىرىلگەن شىعىن كولەمى 20 ميلليون تەڭگە شاماسىندا. اتالعان فاكتىلەر بويىنشا قىلمىستىق ىستەر تىركەلىپ، كۇدىكتىلەر ۋاقىتشا ۇستاۋ يزولياتورىنا قامالدى. تەرگەۋ امالدارى جالعاسىپ جاتىر.
