قىرعىزستان مەن تاجىكستان ساعات 20:00 دەن باستاپ اتىستى توقتاتۋ تۋرالى كەلىسىمگە كەلدى
كەلىسسوز بارىسىندا تاراپتار ەكى ەلدىڭ شەكاراسىندا بولعان جاعدايدى رەتتەۋگە قاتىستى بىرلەسكەن قيمىلداردى تالقىلادى.
قىرعىزستان سىرتقى ىستەر مينيسترلىگىنىڭ حابارلاۋىنشا، ەكى ەلدىڭ سىرتقى ىستەر ۆەدومستۆولارىنىڭ وكىلدەرى ەكى تاراپتان دا كىسى ءولىپ، ادامداردىڭ جاراقاتتانۋىنا الىپ كەلگەن شيەلەنىستى جاعدايدى ساياسي ديپلوماتيالىق قۇرالداردى قولدانا وتىرىپ، بەيبىت تۇردە رەتتەۋ كەرەكتىگىن اتاپ ءوتتى.
مينيستر ر. قازاقبايەۆ قىرعىز تاراپىنىڭ وزگە ەلدىڭ جەرىنە كوز تىگىپ وتىرماعانىن جانە ءوز ەلىنىڭ جەرىن دە ەشكىممەن بولىسپەيتىنىن اتاپ ءوتتى.
وسى رەتتە ول شەكاراداعى بارلىق شارۋاشىلىق ماسەلەلەر قىرعىز-تاجىك شەكاراسىن دەليميتاتسيالاۋ مەن دەماركاتسيالاۋ جونىندەگى ۇكىمەت دەلەگاتسيالارى اياسىنداعى جوعارى وكىلدەردىڭ قاتىسۋىمەن كەلىسسوزدەر بارىسىندا شەشىلۋى قاجەتتىگىنە نازار اۋداردى.
سونداي-اق ول ەكى ەل اراسىنداعى سەنىمدى اسىرەسە شەكاراعا جاقىن جەردە نىعايتىپ، شەكارالاس اۋدانداردا قاۋىپسىزدىك پەن تۇراقتىلىقتى قامتاماسىز ەتۋمەن بايلانىستى شارالاردى قولعا الۋ كەرەكتىگىنە نازار اۋدارىپ، جەرگىلىكتى حالىقتاردىڭ اراسىنداعى شيەلەنىستى قوزدىرۋعا دەگەن كەز كەلگەن ۇمتىلىستىڭ جولىن كەسۋ كەرەكتىگىن ايتتى.
بىرنەشە كولىسسوزدەردىڭ بارىسىندا ق ر مەن ت ر اراسىندا ساعات 20:00 دەن باستاپ، اتىستى تولىق توقتاتۋ جانە اسكەردى ايماقتان الىپ كەتۋ تۋرالى كەلىسىم جاسالدى.
