قازاقستاندا شاعىن جانە ورتا بيزنەس سانى 2,5 ەسەگە ارتتى

 جالپى وتىرىس بارىسىندا ءماجىلىس دەپۋتاتى نۇرتاي سابيليانوۆ قارجى جانە ۇلتتىق ەكونوميكا مينيسترلەرىنەن شاعىن جانە ورتا بيزنەس قىزمەتىنەن تۇسەتىن سالىقتىق تۇسىمدەرگە مونيتورينگ نەلىكتەن جۇرگىزىلمەيتىندىگىن، ونىڭ ۇلەسى قانداي ەكەنىن سۇراعان بولاتىن.

 ۇلتتىق ەكونوميكا ءمينيسترى تيمۋر سۇلەيمەنوۆتىڭ ايتۋىنشا، شاعىن جانە ورتا بيزنەستى دامىتۋ مينيسترلىكتىڭ جانە جالپى ۇكىمەتتىڭ باسىم باعىتتارىنىڭ ءبىرى سانالادى.

«ءبىز ءۇشىن ەڭ نەگىزگى كورسەتكىش - شاعىن جانە ورتا بيزنەستىڭ جالپى قوسىلعان قۇنى. سوڭعى 5 جىلدىڭ ىشىندە، 2012 -جىلى شاعىن جانە ورتا بيزنەستىڭ جالپى قوسىلعان قۇنى 5,3 تريلليون تەڭگەنى قۇرادى. ال وتكەن جىلى 13,5 تريلليون تەڭگە بولعان ەدى. ياعني، سوڭعى 5 جىلدىڭ ىشىندە شاعىن جانە ورتا بيزنەستىڭ 2,5 ەسەگە ءوسۋىن بايقاپ وتىرمىز. بۇل وتە جاقسى، ەلەۋلى كورسەتكىش دەۋگە بولادى. سالىقتىق تۇسىمدەرگە قاتىستى ايتار بولسام، ءبىزدىڭ ەسەپتەۋىمىز بويىنشا ولار وتكەن جىلدىڭ ىشىندە 10 پايىزعا ءوستى»، - دەدى تيمۋر سۇلەيمەنوۆ.

ءوز كەزەگىندە قارجى ءمينيسترى باقىت سۇلتانوۆ تا بيۋدجەتتەن مەملەكەتتىك باعدارلامالارعا، شاعىن جانە ورتا بيزنەسكە جان- جاقتى قولداۋ كورسەتىلەتىندىگىن ايتتى.

«ال مونيتورينگ تۋرالى ايتار بولساق، 300 ءىرى كاسىپورىننىڭ جالپى جىلدىق اينالىم كولەمى بىرەۋىندە عانا 105 ميلليارد تەڭگەنى قۇرايدى. بۇل شاعىن جانە ورتا بيزنەستىڭ اينالىمىنان 900 ەسەگە ۇلكەن. سوندىقتان قاتەلىكتەر، جالتارۋ سىزباسى بولعان كەزدە ولار بيۋدجەتتىڭ شىعىندارىنا ەداۋىر اسەرىن بەرۋى مۇمكىن. سوندىقتان جالپى ءىرى كاسىپورىنداردىڭ 80 پايىزىنىڭ سالىقتىق تولەمدەرىن بەرەتىن 300 كاسىپورىنعا ارنايى مونيتورينگ جاسالادى. 1,5 ميلليون سالىق تولەۋشىلەردىڭ 90 پايىزىن شاعىن جانە ورتا بيزنەس قۇرايدى. الدىمىزعا قويىلعان ماقساتقا سايكەس جالپى ىشكى ءونىمنىڭ ۇلەسىندە 50 پايىز شاعىن جانە ورتا بيزنەس بولۋى كەرەك. ولار دا باقىلاۋدان تۇسپەۋى ءتيىس. ءتيىستى جۇمىس جۇرگىزىلىپ جاتىر»، - دەدى باقىتجان سۇلتانوۆ.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى