كەڭەس كەزىندە شىعارىلعان كىر تاستارىن 2,5 ميلليون تەڭگەگە ساتىپ الۋعا دايىن
ءبىراق ول كەڭەس كەزىندە شىعارىلعان، ءارى ءتۇبى جايپاق بولۋى ءتيىس.
وسىنداي ءتيىمدى حابارلاندىرۋدان سوڭ تۇرعىندار ءتىپتى ءبىر-ءبىرىنىڭ ۇيىنە ۇرلىققا ءتۇسىپ، كىر تاستارىن الىپ كەتىپ جاتىر دەپ حابارلايدى ك ت ك ارناسى.
كىر تاسىن كوتەرۋ سپورتىنا ماڭعىستاۋلىقتار اسا قىزىعۋشىلىق تانىتقان ەمەس. ونى تەك زىلتەمىر، گانتەلدەرمەن بىرگە كەشەندى سپورت تۇرىندە عانا قولدانادى. ءتىپتى وبلىستا ارنايى قاۋىمداستىق تا جوق، چەمپيوناتتار دا سيرەك وتەدى. سوعان قاراماستان كىر تاسىنا دەگەن سۇرانىس ارتىپ تۇر.
وندا دا سۇرانىستاعى كىر تاستارى جاڭا بولماۋى كەرەك. كەڭەس كەزىندە شىعارىلعان ءارى وندا «س س س ر» دەگەن جازۋى بولۋى ءتيىس. سالماعى ءارتۇرلى: 16, 24, 32 كەلى. ەڭ باستىسى - قۇلاماۋى كەرەك.
كىر تاستارىن ساتىپ الۋشىلاردىڭ حابارلاندىرۋى عالامتور جەلىسىندە تولىپ تۇر. ولار ءبىر سپورت جابدىعى ءۇشىن ەكى جارىم ميلليون تەڭگەگە دەيىن ۇسىنادى. اقشانى قولما-قول بەرمەك. ءدال وسىنداي ۇسىنىسپەن ولار سپورت زالدارى مەن فيتنەس-كلۋبتاردى دا ارالاپ ءجۇر.
«بىزگە بىرنەشە كىر ساتىپ الۋشىلار كەلىپ كەتتى. نەگىزىنەن قۇلامايتىن تاستاردى سۇرايدى. ءجۇز مىڭ تەڭگەدەن ءبىر ميلليون تەڭگەگە دەيىن اقشا ۇسىندى. تەك ءبىزدىڭ تاستار ولاردىڭ تالاپتارىنا ساي كەلگەن جوق»، - دەيدى جاتتىقتىرۋشى ۆلاديمير بوريشپولوۆ.
اقتاۋلىقتار كىر تاستارىن الماتى مەن استاناعا جىبەرەمىز دەيدى. ال ونداعى ساتىپ الۋشىلار تاۋاردى قايدا اتتاندىراتىنىن قۇپيا ۇستاپ وتىر. بۇل ۋاقىتتا ەل اراسىندا كىر تاستارىنا دەگەن قۇشتارلىق ەداۋىر اتقان. ءتىپتى تۇرعىندار سول ءۇشىن ءبىر-ءبىرىنىڭ ۇيىنە ۇرلىققا دا ءتۇسىپ جاتىر.
«جارمىش اۋىلىندا 1985-جىلى تۋعان اۋىل ازاماتىنىڭ اۋلادا تۇرعان كىر تاسى ۇرلانىپ كەتكەن. بۇل دەرەك بويىنشا كۇدىكتى ىزدەستىرىلىپ جاتىر»، - دەيدى ماڭعىستاۋ وبلىستىق ءى ءى د رەسمي وكىلى جازيرا ءابىل.
كەڭەستىك كىر تاستارىنىڭ ءبىر ساتتە باعالى بوپ شىعا كەلۋىنىڭ ناقتى سەبەبى بەلگىسىز. بىرەۋلەر ونىڭ قۇرامىندا قۇنى التىننان قىمبات پاللادي مەتالى بار دەيدى. الايدا ونى عىلىمي تۇرعىدا زەرتتەپ كورگەن ەشكىم جوق. سوندىقتان ەكىنشى توپ بۇل تەك الاياقتاردىڭ ارەكەتى دەپ وتىر. سەبەبى كەزىندە «زينگەر» تىگىن ماشيناسى مەن كونە توڭازتقىشتاردا قۇندى مەتالل بار دەپ ەل اراسىندا دۇربەلەڭ تۋعانى بار بولاتىن.
