قازاقستاندا 2,5 مىڭنان استام اتا- انا بالا اسىراپ الۋ كەزەگىندە تۇر
بۇل تۋرالى كەشە ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە ق ر ءبىلىم جانە عىلىم مينيسترلىگىنىڭ بالالار قۇقىعىن قورعاۋ كوميتەتى ءتوراعاسىنىڭ ورىنباسارى مانشۇك ابدىكارىم ايتتى.
«بۇگىندە رەسپۋبليكا بويىنشا 2,5 مىڭنان استام اتا- انا بالا اسىراپ الۋ كەزەگىندە تۇر. ولاردىڭ شامامەن 10 پايىزدان استامى 6 جاستان اسقان بالالاردى اسىراپ الۋعا نيەتتى. ال قالعاندارى جاڭا تۋعان نارەستەدەن باستاپ 3 جاسقا دەيىنگى ءسابيدى اسىراپ العىلارى كەلەدى»، - دەدى ول.
ونىڭ اتاپ وتۋىنشە، ءدال وسى جايت ەلىمىزدەگى بالا اسىراپ الۋعا نيەت تانىتۋشىلاردىڭ كەزەگىن قالىپتاستىرىپ وتىر.
«بالالار ۇيىندە مۇنداي جاستاعى دەنى ساۋ، الەۋەتتىك اسىراپ الۋشىلاردىڭ تالاپتارىنا سايكەس كەلەتىن بالا جوقتىڭ قاسى. سوندىقتان دا كەزەك بار. ءبىزدىڭ بالالار ۇيلەرىندەگى بالالار وزدەرىن اسىراپ العاندى قالايدى»، - دەدى م. ابدىكارىم.
ءبىلىم جانە عىلىم مينيسترلىگىنىڭ مالىمەتىنە سايكەس، رەسپۋبليكادا جەتىم جانە اتا- اناسىنىڭ قامقورلىعىنسىز قالعان 33680 بالا بار. ولاردىڭ ىشىندە 21856 بالا قازاقستاندىق وتباسىلاردىڭ قامقورلىعىندا، ال 1947 سى پاتروناتتىق ءتالىم- تاربيە الۋدا.
قازاقستاندىق وتباسىلار اسىراپ العان 10-15 جەتىم بالالار ۇيىنە قايتىپ ورالادى.
«بالالاردىڭ قايتا ورالۋى، وكىنىشتى بولسا دا ورىن الىپ جاتادى. ءبىزدىڭ ستاتيستيكالىق دەرەكتەرگە سايكەس جىل سايىن قازاقستاندىق وتباسىلار اسىراپ العان شامامەن 10-15 بالا بالالار ۇيىنە قايتىپ ورالادى. مۇنىڭ باسىم بولىگى اتا- انالاردان اۋرۋ تابىلۋىنا بايلانىستى ورىن الادى. ەگەر بالا ەرەسەك بولسا، وندا ونىڭ اتا- اناعا بەيىمدەلۋ كەزەڭى دە وتە قيىن جۇرەدى. ءتىپتى، كەيدە اتا- انالاردىڭ دا بالانى قابىلداۋعا دايىن ەمەستىگى بايقالىپ قالادى»، - دەدى ول.
ونىڭ سوزىنە قاراعاندا، ەلوردادا بالالار ۇيىندە 1 بالانى كۇتۋگە شامامەن جىلىنا 1,5 ميلليون، ايىنا 118 مىڭ، ال كۇنىنە شامامەن 4 مىڭ تەڭگە شىعىندالادى. قارجى سوماسى ءار وڭىردە ءارتۇرلى. ماسەلەن، سولتۇستىك قازاقستان وبلىسىندا ول ءبىرشاما تومەن.
«ەگەر بالالار ءۇيىنىڭ شامامەن 10 تاربيەلەنۋشىسىن اسىراپ الۋعا كەلىسەتىن وتباسى بولسا، وندا بىزدە ولاردى اسىراۋ، جالاقى تولەۋ، جوندەۋ جۇمىستارىنا بايلانىستى شىعىستارىن تولەۋ مۇمكىندىگىن قاراستىرار ەدىك. مۇنى ءبىز ءىرى بالالار ۇيىندەگى جۇكتەمەنى تومەندەۋ ماقساتىندا جۇرگىزەمىز. ماتەريالدىق تۇرعىدا قولداۋ كورسەتەمىز. جالپى العاندا، نورماتيۆتىك بازا بىزگە مۇندايعا مۇمكىندىك بەرەدى» ، - دەدى م. ابدىكارىم.
اۆتور: مارلان جيەمباي
