قازاقستاندىق عالىمداردىڭ الەمدىك عىلىمي باسىلىمدارداعى ماقالالارىنىڭ سانى 2-3 ەسەگە ارتتى - ءا . ىبىرايەۆ

بۇل تۋرالى بۇگىن الماتىدا «شەت ەلدىك عىلىمي اقپاراتتىق رەسۋرستاردى پايدالانۋ: تاجىريبە جانە باسىم باعىتتار» اتتى دوڭگەلەك ۇستەل بارىسىندا «ۇلتتىق عىلىمي- تەحنيكالىق اقپارات ورتالىعى» ا ق پرەزيدەنتى، ساياسي عىلىمدار كانديداتى ءادىل ىبىرايەۆ مالىمدەدى.

ونىڭ ايتۋىنشا، كۇنى بۇگىنگە دەيىن  Elsevier B.V جانە ThomsonReuters سىندى حالىقارالىق ماڭىزدى عىلىمي مالىمەتتەر بازالارىندا 11158 جانە 9869 قازاقستاندىق عىلىمي ماقالا جيناقتالىپتى. ولار وسى بازالارعا كىرەتىن رەيتينگى جوعارى 1000 نان استام عىلىمي جۋرنالداردا جارىق كورگەن.

«قازاقستاندىق عىلىمي ماقالالار شەت ەلدىك عىلىمي باسىلىمداردا نەگىزىنەن اعىلشىن تىلىندە شىعۋدا. بۇل جەردە ءبىر ايتا كەتەتىن جايت، قازاقستاندىق عىلىمي ماقالالاردىڭ باسىم بولىگى فيزيكا، حيميا، ماتەماتيكا جانە ماتەريالتانۋ سالاسى بويىنشا جارىق كورگەن. ياعني، بۇل سالالاردا قازاقستاندىق عالىمداردىڭ الەمدىك عىلىمعا قوسقان ۇلەستەرى وتە زور.   دەگەنمەن، ەكونوميكا جانە پەداگوگيكا سالاسى بويىنشا دا قازاقستاندىق اۆتورلارعا الەمدىك دەڭگەيدە سىلتەمە جاسالىپ تۇراتىنىن ايتۋعا بولادى. ال ونەر جانە گۋمانيتارلىق عىلىمدار بويىنشا قازاقستاندىق اۆتورلارعا ازىرگە سىلتەمە جاسالىنىپ جاتقان جوق»، - دەدى ءا. ىبىرايەۆ.

سونىمەن قاتار، ءسوز سوڭىندا ول شەت ەلدىك اقپاراتتىق رەسۋرستاردى قولدانۋدىڭ تيىمدىلىگىن ارتتىرۋدا ءبىرقاتار جۇمىستاردى اتقارۋ كەرەكتىگىن العا تارتتى.

«بىرىنشىدەن ۇلتتىق جازىلىمعا ۇمىتكەر شەت ەلدىك اقپاراتتىق رەسۋرستار مەن باسىلىمداردىڭ رەيتينگىن قالىپتاستىرۋ بويىنشا ساراپتامالىق كوميسسيا قۇرۋ، ەكىنشىدەن باسىمدى باعىتتار بويىنشا ارنايى مامانداندىرىلعان اقپاراتتىق رەسۋرستارعا قول جەتىمدىلىكتى قامتاماسىز ەتۋ ماقساتىندا عىلىمي مەكەمەلەر مەن جوعارى وقۋ ورىندارىن بىرىكتىرەتىن كونسورتسيۋم قۇرۋ، ۇشىنشىدەن قازاقستاندىق اۆتورلاردىڭ عىلىمي ماقالالارىن حالىقارالىق ستاندارتتارعا سايكەس ەتىپ راسىمدەۋ بويىنشا ورتاق تالاپتاردى ازىرلەۋ جانە تورتىنشىدەن عىلىم جانە ءبىلىم سالاسىنىڭ ماماندارى اراسىندا شەت ەلدىك ەلەكتروندىق اقپارات رەسۋرستارىن قولدانۋ تاسىلدەرى بويىنشا وقىتۋ سەمينارلارىن جانە ترەنينگتەرىن ۇيىمداستىرۋ كەرەك»، - دەدى ءا. ىبىرايەۆ.

 اۆتور:   جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى