الداعى ءۇش جىلدا بيۋدجەت تاپشىلىعى 2,2 پايىزدان 1,7 پايىزعا دەيىن تومەندەيدى - ب. سۇلتانوۆ

بۇل تۋرالى بۇگىن ماجىلىستە «2015-2017 - جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىنىڭ تانىستىرىلىمى بارىسىندا قارجى ءمينيسترى باقىت سۇلتانوۆ ءمالىم ەتتى.

 قارجى ءمينيسترىنىڭ ايتۋىنا قاراعاندا، الداعى ءۇش جىلعا تاپشىلىق جاڭا بيۋدجەت ساياساتى تۇجىرىمداماسىمەن بەكىتىلگەن شەكتەۋلەر نەگىزىندە انىقتالعان. بۇل رەتتە بيۋدجەت تاپشىلىعى ىشكى جالپى ونىمگە 2015 -جىلى 2,2 پايىزدى نەمەسە 997 ميلليارد تەڭگەنى قۇراسا، 2016 -جىلى - 1059 ميلليارد تەڭگەنى نەمەسە 2,1 پايىز، ال 2017 - جىلى - 973 ميلليارد تەڭگەنى نەمەسە 1,7 پايىزدى قۇرايتىن بولادى.

 «رەسپۋبليكالىق بيۋدجەت شىعىستارى 2015 -جىلعا 7 ترليون 307 ميلليارد تەڭگە كولەمىندە اعىمداعى جىلعى دەڭگەيگە قاراعاندا 2,6 پايىز وسىمىمەن بولجانادى. ال 2016 - جىلعا 7 797 ميلليارد تەڭگە الدىڭعى جىلدىڭ دەڭگەيىنە قاراعاندا 6,7 پايىز وسىمىمەن، 2017 - جىلعا -  8100 ميلليارد تەڭگە 3,9 پايىز وسىمىمەن جوسپارلانادى» ، - دەيدى ب. سۇلتانوۆ.

 2015-2019 - جىلدار ارالىعىندا ەلىمىزدەگى جالپى ىشكى ءونىم ءوسىمى 5,6-6,8 پايىزدىق وسىممەن بولجانادى.

جيىن بارىسىندا 2015-2019 - جىلدارعا ارنالعان قازاقستاننىڭ الەۋمەتتىك- ەكونوميكالىق دامۋ بولجامىن جاريالاعان ۇلتتىق ەكونوميكا ءمينيسترى ەربولات دوسايەۆ الداعى ءۇش جىلدا ىشكى جالپى ءونىمنىڭ ناقتى ءوسىمى 6,8 پايىزعا دەيىن بولجاناتىندىعىن اتاپ ءوتتى. «2015 -جىلى ءى ج ءو نومينالدىق كولەمى 42 تريلليون تەڭگەنى قۇرايدى، ال 2019 - جىلى بۇل كورسەتكىش 72 تريلليون 800 ميلليارد تەڭگەگە جەتەدى» ، - دەدى ۇلتتىق ەكونوميكا ءمينيسترى.

 ونىڭ ايتۋىنا قاراعاندا، 2015-2019 - جىلدار ارالىعىنا مۇنايدىڭ الەمدىك باعاسىنىڭ بولجامدى دەڭگەيى بەررەلىنە 90 دوللاردى قۇرايدى.

 اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى