فۋتبول: قازاقستان-تاجىكستان جولداستىق كەزدەسۋ ەسەبى - 2:1

الماتىنىڭ ورتالىق ستاديونىندا وتكەن جولداستىق كەزدەسۋگە جانكۇيەرلەر كوپ جينالدى.

ويىننىڭ العاشقى مينۋتتارى تاجىكستاندىق فۋتبولشىلاردىڭ باسىمدىعىمەن ءوتتى. دەگەنمەن، كوپ ۇزاماي وتانداستارىمىز ويىن تىزگىنىن ءوز قولدارىنا الدى. بىرنەشە رەت قاۋىپتى ءسات تۋدىرعانىمەن تاجىكستان قۇراما كومانداسىنىڭ تاجىريبەلى قاقپاشىسى اليشەر تويچيەۆ قىراعىلىق تانىتا ءبىلدى. الايدا ويىننىڭ 36- مينۋتىندا جارتىلاي شابۋىلشى باۋىرجان يسلامحان ەسەپ اشىپ، جانكۇيەرلەردىڭ مەرەيىن ۇستەم ەتتى.

ءبىرىنشى تايمدا باسقا گول سوعىلعان جوق. ەكىنشى تايمدا ويىننىڭ 56- مينۋتىندا كەزەكتى قارىمتا شابۋىل بارىسىندا تاجىكستاندىق جارتىلاي قورعاۋشى فارحاد توحيروۆ ەسەپتى تەڭەستىرىپ كەتتى. وسىدان كەيىن ويىن شيەلەنىسە ءتۇستى. قازاقستاندىق فۋتبولشىلار ءۇستىن-ءۇستىن شابۋىلداۋمەن بولدى. ويىننىڭ 63- مينۋتىندا ۇلان قونىسبايەۆ ەكىنشى دوپتى سوعىپ، قازاقستان قۇراما كومانداسىن العا شىعاردى. وتانداستارىمىز ەكىنشى تايمدا دا ەسەپتى ۇلعايتۋعا تاعى بىرنەشە مۇمكىندىككە يە بولسا دا، دوپتى قاقپاعا باعىتتار ساتكە كەلگەندە ءمۇلت كەتىپ جاتتى. وسىلايشا، ويىن 2:1 ەسەبىمەن اياقتالدى.

ەستەرىڭىزگە سالا كەتەيىك، قازاقستان مەن تاجىكستان ۇلتتىق قۇراما كوماندالارى بۇعان دەيىن ءۇش رەت كەزدەسكەن بولاتىن. ەكى رەتىندە قازاقستاندىقتار جەڭىسكە جەتىپ، ءبىر ويىن تەڭ اياقتالدى. ەندى مىنە، ءتورتىنشى كەزدەسۋ دە قازاقستاندىق فۋتبولشىلاردىڭ پايداسىنا شەشىلدى.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى