دومبىرا كۇنى 1 مىڭ اقتوبەلىك كۇي تارتتى - ۆيدەو
ۇلتتىق دومبىرا كۇنى وبلىسقا تانىمال اتاقتى كۇيشىلەر باستاعان 1 مىڭ دومبىراشى ءبىر مەزەتتە بىرنەشە كۇي تارتتى. قولىنا ۇلتتىق اسپاپتى ۇستاعان اقتوبەلىكتەرگە قازاقستاننىڭ ەڭبەك سىڭىرگەن مادەنيەت قايراتكەرى، كومپوزيتور، ديريجەر قايىرعالي قوجانبايەۆ العىس ايتتى.
«دومبىرا قازاقتىڭ جان جولداسى، رۋحاني جان ازىعى بولىپ كەلە جاتىر. دومبىرا تۋرالى ءان دە بار. بالەنباي مىڭ كۇي بار. انشىلەردىڭ، كۇيشىلەردىڭ، وركەستردىڭ قولىندا، ءبىر سوزبەن ايتقاندا ءبارىنىڭ قولىندا - دومبىرا. دومبىرا تۋرالى «9 پەرنە تاعىلعان، جەلدەي ەسىپ، سۋداي تاسىپ اعىلعان» دەگەن ءان سوزدەرى بار. «ناعىز قازاق قازاق ەمەس، ناعىز قازاق - دومبىرا» دەپ تە ايتامىز. دومبىرانى جوعارى ساناپ، اسپەتتەپ، وعان وزدەرىنىڭ رۋحاني سوزدەرىن، كوڭىلدەگى، جۇرەگىندەگى ويلارىن ايتقان لەبىز دە از ەمەس. ۇكىمەتىمىز وسىنىڭ ءبارىن ەسكەرە كەلىپ، دومبىراعا وسىنداي كۇن بولگەن. وعان حالىق ريزا. قازاق حالقى، ءاربىر قازاق ءتىرى تۇرعاندا دومبىرا ولمەيدى، دومبىرا سايرايدى، دومبىرا كۇي تارتادى، ءوزىنىڭ ادامعا دەگەن، حالىققا دەگەن قىزمەتىن اتقارا بەرەدى»، - دەدى قايىرعالي قوجانبايەۆ.
شارادا قۇرمانعازى ساعىرباي ۇلىنىڭ «اداي»، «سارىارقا»، «بالبىراۋىن»، ءابدىمومىن جەلدىبايەۆتىڭ «ەركە سىلقىم»، احمەت جۇبانوۆتىڭ «بي كۇيى» كۇيلەرىن ورىندادى. شاراعا قالا تۇرعىندارىمەن قاتار مەكتەپ وقۋشىلار، ستۋدەنتتەر، مۋزىكا مەكتەبىنىڭ تاربيەلەنۋشىلەرى قاتىستى.
Посмотреть эту публикацию в Instagram
«مەن اناما، اجەمە دومبىرا ۇيىرمەسىنە قاتىسقىم كەلەتىنىن ايتتىم. ۇيىرمەنىڭ كەيبىرى الىس بولدى. ءبىراق كەيىن مەكتەپتە اشىلدى. ءقازىر كۇي ۇيرەنىپ ءجۇرمىن. اجەم دە ۇيرەتەدى. ءوزىم 10 جاستامىن. دومبىرا شەرتىپ، ءان دە ايتقىم كەلەدى»، - دەدى مەكتەپ وقۋشىسى نۇرايىم ساكەنوۆا.
بۇل كۇنى وقۋشىلار عانا ەمەس، ۇستازدارى دا بەلسەندى بولدى.
«دومبىرا كۇنىن دۇرىس بەلگىلەدى. دومبىرا - قازاقتىڭ جانى. دومبىرامەن مۇڭ- زارىن ايتىپ، شەرىن تارقاتادى. ۇيدە ەكى دومبىرام بار. نەمەرەلەرىمە دە ۇيرەتەمىن. ىنتاسى جاقسى»، - دەدى مادەنيەت ءۇيىنىڭ قىزمەتكەرى ومىرسەرىك ءتاجىعۇلوۆ.
شارا كەزىندە قولونەر شەبەرلەرىنىڭ كورمەسى ءوتتى.
