تەمەكى ونىمدەرى 1-قاڭتاردان باستاپ قانشا تەڭگەگە قىمباتتايتىنى ايتىلدى
قازاقستاندا 2023 -جىلى تەمەكى ونىمدەرىنىڭ باعاسىن 590 تەڭگەدەن (2022 -جىلعا بەكىتىلگەن باعا) 650 تەڭگەگە ءوسىرۋ جوسپارلانىپ وتىر.
بۇل تۋرالى اشىق ن ق ا پورتالىندا جاريالانعان قارجى مينيسترلىگىنىڭ بۇيرىعىنا ەنگىزىلەتىن وزگەرتۋلەردەن بەلگىلى بولدى.
«فيلترلى، فيلترسىز 20 (جيىرما) سيگارەتكە، پاپيروستارعا، سيگاريللالارعا جانە قىزدىرىلاتىن تەمەكىسى بار بۇيىمدارعا 2023 -جىلعى 1-قاڭتاردان باستاپ 650 تەڭگە مولشەرىندە ەڭ تومەنگى بولشەك ساۋدا باعاسى بەلگىلەنسىن» دەپ جازىلعان قۇجات جوباسىندا.
ەسكە سالا كەتسەك، 2023 -جىلعى 1-قاڭتاردان باستاپ تەمەكى بۇيىمدارىنىڭ باعاسى وسەتىنى بۇرىننان بەلگىلى بولعان. الايدا، جوسپار بويىنشا 2023 -جىلعى باعا 630 تەڭگەنى قۇراۋى ءتيىس ەدى.
باعانى تاعى 20 تەڭگەگە ارتتىرۋعا «اتامەكەن» ۇلتتىق كاسىپكەرلەر پالاتاسىنىڭ ۇسىنىسى سەبەپ بولعان. كاسىپكەرلەر پالاتاسى بۇل ارقىلى تەمەكى بۇيىمدارىن قازاقستانعا جەتكىزۋدە لوگيستيكالىق ىركىلىستەردىڭ تاۋەكەلىن ازايتۋدى كوزدەپ وتىر.
