اقمولا تۇرعىنى جالعان پوليتسەيگە 1 ميلليون تەڭگە بەرگەن
كوكشەتاۋ قالاسىنىڭ پوليتسيا باسقارماسىنا قالانىڭ 23 جاستاعى تۇرعىنى شاعىمداندى. جاس جىگىت 28- قازاندا وبلىس ورتالىعىنىڭ قوناق ءۇي كەشەندەرىنىڭ بىرىنەن شىعار كەزدە وعان ەر ادام كەلىپ، ءوزىن پوليتسيا قىزمەتكەرى رەتىندە تانىستىرىپ، اقشا تالاپ ەتكەنىن ايتتى.
ءوتىنىش بەرۋشىنىڭ ايعاقتارىنا سايكەس، ونى قاسكۇنەم جەڭىل ءجۇرىستى ايەلدەرىنە بارعانى ءۇشىن قىلمىستىق جاۋاپتىلىقپەن قورقىتىپ، ميلليون تەڭگە تالاپ ەتكەن.
جەدەل-ىزدەستىرۋ ءىس-شارالارى بارىسىندا كريمينالدىق پوليتسيا ءبولىمىنىڭ قىزمەتكەرلەرى كۇدىكتىنى انىقتادى. ول كوكشەتاۋ قالاسىنىڭ ۋاقىتشا جۇمىس ىستەمەيتىن 28 جاستاعى تۇرعىنى بولىپ شىقتى. ونى ءتىنتۋ كەزىندە كۇدىكتىدەن پوليتسيا قىزمەتكەرى كۋالىگىنىڭ مۇقاباسى مەن اقشا تابىلىپ، تاركىلەندى.
پوليتسيا باسقارماسى وسى فاكتىگە سايكەس ق ر ق ك 190-بابىنىڭ 1-بولىگى «الاياقتىق» بويىنشا سوتقا دەيىنگى تەرگەپ-تەكسەرۋدى باستادى.
