ناۋقاستاردى قاشىقتان باقىلاۋ جۇيەسىن ويلاپ تاپقان وقۋشىلار 1 ميلليون تەڭگە الدى
قازىر ءبىلىم ورداسىندا 713 وقۋشى ءبىلىم الىپ ءجۇر. كارانتينگە بايلانىستى وقىتۋ قاشىقتان جۇرگىزىلۋدە. مەكتەپ باسشىلىعى ولاردىڭ ساباققا قاتىسۋىن ارنايى ونلاين باعدارلاما ارقىلى تەكسەرۋ مۇمكىندىگى بار ەكەنىن جەتكىزدى. ايماق باسشىسىنا وقۋشىلاردىڭ ۇزدىك عىلىمي جوبالارى ۇسىنىلدى. ن ز م وقۋشىلارى دارىگەرلەرگە كوروناۆيرۋستىق ينفەكتسياسى بار ناۋقاستىڭ جاعدايىن قاشىقتىقتان باقىلاۋعا مۇمكىندىك بەرەتىن ارنايى قۇرال ويلاپ تاۋىپتى. ءموبيلدى قوسىمشا سمارتفونعا يمپۋلستىك وكسيمەتر ارقىلى اقپارات جىبەرەدى. دارىگەر ناۋقاستىڭ جاعدايىنىڭ ديناميكاسىن وعان نەمەسە پالاتاعا بارماي- اق باقىلاي الادى. ونەرتابىستىڭ مۇمكىندىكتەرىن وبلىستىق دەنساۋلىق ساقتاۋ باسقارماسىنىڭ باستىعى اسەت قاليەۆ سىناپ كوردى.
«ءبىر اۋرۋحاناعا تاجىريبە رەتىندە ورناتۋ كەرەك. ەگەر وڭ ناتيجە بەرسە، باسقا دا ەمدەۋ مەكەمەلەرىنە دە ەنگىزۋگە بولادى. اسىرەسە، بۇل - قازىرگى كەزدە وتە قاجەتتى قۇرىلعى»، - دەپ اتاپ ءوتتى بەردىبەك ساپاربايەۆ.
اكىم جۇمىستى جوعارى باعالاپ، ونىڭ اۆتورلارى، 12-سىنىپ وقۋشىلارى ابىلاي سىدىقوۆ پەن انەليا ابدىمالىككە، ءبىر ميلليون تەڭگەنىڭ سەرتيفيكاتىن تابىستادى. ايماق باسشىسىنىڭ نازارىنا بۇدان باسقا دا جاس عالىمداردىڭ ەڭبەكتەرى ۇسىنىلدى. وبلىس اكىمى مەكتەپتىڭ جاتاقحاناسى مەن كىتاپحاناسىن دا ارالاپ كوردى. كەيىن اۋلادا بەردىبەك ساپاربايەۆ كىشىگىرىم راكەتانىڭ اسپانعا كوتەرىلگەنىن دە كوردى. ايماق باسشىسى زياتكەرلىك مەكتەپتەگى وڭ تاجىريبە ءوڭىردىڭ وزگە ءبىلىم وشاقتارىنا دا تاراۋى كەرەكتىگىنە ءمان بەردى.
