قازاقپارات كۇنتىزبەسى: 1- قىركۇيەك
اتاۋلى كۇندەر
ءبىلىم كۇنى
قازاقستان رەسپۋبليكاسى پرەزيدەنتىنىڭ 1998-جىلعى 20- قاڭتارداعى جارلىعىنا سايكەس اتاپ وتىلەدى. بيىل قازاقستان مەكتەپتەرىندە ءبىلىم كۇنى ءىس-شارالارى جانە جاڭا وقۋ جىلىنىڭ باستالۋى ونلاين-رەجيمدە وتەدى.
وزبەكستان رەسپۋبليكاسىنىڭ تاۋەلسىزدىك كۇنى
(1991) تاۋەلسىزدىك تۋرالى شەشىم وزبەكستان رەسپۋبليكاسى جوعارى كەڭەسىنىڭ 1991-جىلعى 31- تامىزداعى سەسسياسىندا قابىلداندى. وسى سەسسيادا قابىلدانعان قاۋلىعا سايكەس، 1- قىركۇيەك تاۋەلسىزدىك كۇنى رەتىندە بەكىتىلىپ، ول دەمالىس كۇنى بولىپ جاريالاندى.
قازاقستان رەسپۋبليكاسى مەن وزبەكستان رەسپۋبليكاسى اراسىنداعى ديپلوماتيالىق قارىم-قاتىناس 1992-جىلى 23- قاراشادا ورناتىلدى.
ەستە قالار وقيعالار
1928-جىلى الماتىدا قازاق مەملەكەتتىك ۋنيۆەرسيتەتى اشىلدى.
1930-جىلى ۋنيۆەرسيتەت قازاق مەملەكەتتىك پەداگوگيكالىق ينستيتۋتى بولىپ قايتا قۇرىلدى. 5 جىلدان سوڭ وعان قازاقتىڭ ۇلى اقىنى ابايدىڭ ەسىمى بەرىلدى.
1992-جىلى ۋنيۆەرسيتەت مارتەبەسىن الىپ، اباي اتىنداعى الماتى مەملەكەتتىك ۋنيۆەرسيتەتى دەپ اتالا باستادى.
1950 -جىلى مۇحتار اۋەزوۆ باستاما جاساپ، قازاق مەملەكەتتىك ۋنيۆەرسيتەتىندە «اباي تانۋ» ءپانىن ەنگىزدى. مۇحتار ومارحان ۇلى اۋەزوۆ (1897-1961) - قازاق ادەبيەتىنىڭ كلاسسيگى، جازۋشى، قوعام قايراتكەرى، فيلولوگيا عىلىمىنىڭ دوكتورى، پروفەسسور، قازاق ك س ر ع ا- نىڭ اكادەميگى، قازاق ك س ر- ءنىڭ ەڭبەك سىڭىرگەن عىلىم قايراتكەرى. شىعىس قازاقستان وبلىسى اباي اۋدانىندا تۋعان. جازۋشى ءوزىنىڭ شىعارماشىلىق جولىندا تالاي جانرعا، تاقىرىپقا ءىز سالىپ، قىرۋار، وچەرك، اڭگىمە، پەسالار جازعان، تاماشا اۋدارمالار جاساعان، ادەبي سىنعا، ادەبيەت تاريحىن زەرتتەۋ جۇمىسىنا بەلسەنە ات سالىسىپ، كوپتەگەن ماعىنالى ماقالالار جاريالاعان، باياندامالار جاساعان، وقۋلىقتار قۇراعان، جوعارى وقۋ ورىندارىندا ءدارىس بەرىپ، تەوريالىق ءبىلىمىن جەتىلدىرىپ وتىرعان.
2000-جىلى تۇركى حالىقتارىنىڭ الماتى مادەنيەت قورى قۇرىلىپ، ونىڭ دەمەۋشىلىگىمەن «تۇرىك دۇنيەسى» گازەتىنىڭ ءبىرىنشى سانى جارىققا شىقتى.
2001-جىلى قازاقستان رەسپۋبليكاسى مەن ەگيپەت اراب رەسپۋبليكاسى اراسىنداعى ەكىجاقتى كەلىسىم نەگىزىندە نۇر-مۇباراك ەگيپەت يسلام ۋنيۆەرسيتەتى قۇرىلدى. ۋنيۆەرسيتەتتە يسلام تەولوگتارى، يمامدار، اراب ءتىلى ماماندارى، اۋدارماشىلار مەن ەلتانۋشىلار دايىندالادى.
2006-جىلى استانادا بەيبىتشىلىك جانە كەلىسىم سارايىنىڭ اشىلۋ سالتاناتى ءوتتى. جوبا اۆتورى - تانىمال بريتاندىق ساۋلەتشى نورمان فوستەر. عيمارات بيىكتىگى 62 مەتر، وندا 1,5 مىڭ ادام سىياتىن وپەرا تەاترى، ءۇش قاباتتى مۇراجاي، كورمە جانە كونسەرت زالدارى، ءدىني كونفەسسيالاردىڭ كەڭسەلەرى ورنالاسقان. اتالمىش نىساندى تۇرىكتىڭ «سەمبول ينشاات» كومپانياسى سالعان.
2010-جىلى لوندوننىڭ قاق ورتاسىنداعى Christie's اۋكتسيون ءۇيىنىڭ باستى كورمە زالدارىندا قازاقستان رەسپۋبليكاسىنىڭ ءا. قاستەيەۆ اتىنداعى مەملەكەتتىك ونەر مۋزەيىنەن جانە جەكە كوللەكتسيالاردان جينالعان ەكسپوناتتار اپارىلىپ، ⅩⅩ عاسىرداعى قازاق جانە ورىس حالىقتارىنىڭ ونەر كورمەسى ۇيىمداستىرىلدى. كورمەنىڭ اشىلۋى باتىس ەۋروپادا بىرەگەي وقيعا بولدى. ول - الەمدە بالاماسى جوق ناعىز شەديەۆرلەردىڭ اۋقىمدى ەكسپوزيتسياسى ەدى.
2011-جىلى استاناداعى 66№ مەكتەپ- ليتسەيدە «جاس ۇلان» ءبىرىڭعاي بالالار مەن جاس ءوسپىرىم ۇيىمى» رەسپۋبليكالىق قوعامدىق بىرلەستىگىنىڭ قاتارىنا العاشقى مۇشەلەردى قابىلداۋ ءراسىمى ءوتتى. ۇيىمنىڭ ماقساتى - ۇلتتىق جانە جالپى ادامزاتتىق قۇندىلىقتارعا سايكەس رۋحاني دۇنيەسى كەڭ تۇلعانى قالىپتاستىرۋ، بالالار مەن جاس وسپىرىمدەردى قازاقستاندىق پاتريوتيزم رۋحىندا تاربيەلەۋ.
2011-جىلى جاڭاوزەن قالاسىنداعى بۇرعىلاۋشىلار اللەياسىندا قازاقستاندا العاش رەت مۇناي-گاز جۇمىسشىلارىنا ارنالعان ەسكەرتكىش اشىلدى.
2011-جىلى «Qazaqstan» ۇلتتىق تەلەارناسى تولىعىمەن قازاق تىلىندە حابار تاراتۋعا ءوتتى.
2014-جىلى شىمكەنتتە تانىمال بوكسشى، وليمپيادا چەمپيونى بەكزات ساتتارحانوۆتى ەسكە الۋعا ارنالعان شارا ءوتتى. ب. ساتتارحانوۆ اتىنداعى سپورتتا دارىندى بالالارعا ارنالعان وبلىستىق مەكتەپ- ينتەرناتىنىڭ الدىنا بوكسشىنىڭ ەسكەرتكىشى قويىلدى.
2014-جىلى استانادا وڭىردەگى ەڭ ۇلكەن قازاق ۇلتتىق حورەوگرافيا اكادەمياسىنىڭ قۇرىلىسى باستالدى. ول ەكسپو-2017 قالاشىعىنا قاراما-قارسى ورنالاسقان. اكادەميا ءتورت كورپۋستان: وقۋ، بالەت، تەاتر جانە تۇرعىن عيماراتتارىنان قۇرالعان. ولاردى جىلى جاياۋجول گالەرەيالارى بىرىكتىرىپ تۇرادى. وقۋ كورپۋسىنىڭ عيماراتىندا جالپى ءبىلىم بەرەتىن مەكتەپ، كوللەدج جانە ينستيتۋت ورنالاسقان.
2016-جىلى الماتىدا جۇزۋدەن قازاقستاننان شىققان العاشقى وليمپيادا چەمپيونى دميتري بالاندين اتىنداعى جاڭا 25 مەترلىك باسسەيننىڭ اشىلۋى ءوتتى.
2017-جىلى الماتى وبلىسىنىڭ قاراساي اۋدانىندا «باتىر بابالار» ەسكەرتكىش كەشەنى اشىلدى. جوبا «رۋحاني جاڭعىرۋ» باعدارلاماسىنىڭ اياسىندا ىسكە اسىرىلدى.
