مۋزەيدەن قۇنى 1 ميلليارد ەۋرو تۇراتىن اشەكەيلەر ۇرلاندى
ەكى ۇرى مۋزەيگە باسا كوكتەپ كىرىپ، ءبىرىنشى قاباتتاعى تەرەزەنىڭ توركوزىن ارامەن كەسىپ، ۆيترينادا تۇرعان اشەكەي بۇيىمداردى قولدى ەتكەنى بەينەكامەراعا ءتۇسىپ قالعان. قاراقشىلار جەڭىل كولىككە ءمىنىپ ءىزىن سۋىتقان. پوليتسيا بىرنەشە مينۋتتا وقيعا ورنىنا جەتىپ كەلدى.
ۇرلىق بولاردىڭ الدىندا عانا مۋزەيگە جاقىن جەردە ءورت بولىپ، اۋداندا ەلەكتر قۋاتى وشىرىلگەن. پوليتسيانىڭ ايتۋىنشا، قىلمىسكەرلەر وسى ارقىلى ءتارتىپ ساقشىلارىنىڭ نازارىن اۋدارىپ، مۋزەيدەگى دابىل جۇيەسىن بۇزعان بولۋى مۇمكىن.
تاريحي ماڭىزى زور بولعاندىقتان، اشەكەي بۇيىمداردىڭ قۇنىن ءدوپ باسىپ ايتۋ قيىن. ءبىراق Bild گازەتىنىڭ جازۋىنشا، 1 ميلليارد ەۋروعا جۋىق زالال كەلگەن.
«التىن قور» - درەزدەننىڭ تانىمال مۋزەيلەرىنىڭ ءبىرى. ونىڭ كورمە زالدارىندا ءۇش مىڭنان استام ەكسپونات ساقتاۋلى.
