تۇركىستاندىق بالۋان «جىگىت سۇلتانى» اتانىپ، 1 ميلليون تەڭگەنى جەڭىپ الدى
جىل سايىن وبلىس كولەمىندە وتەتىن سايىس بيىل حالىقارالىق دەڭگەيدە ۇيىمداستىرىلدى. ەلىمىزدىڭ ءار وبلىسىمەن قاتار، موڭعوليا مەملەكەتىنەن دە جالپى بىلەكتى دە ءبىلىمدى ءارى ونەرلى 23 جىگىت باق سىناستى. ەكى كۇنگە سوزىلعان جارىستا جامبى اتۋ، تەڭگە ءىلۋ، اۋدارىسپاق، قازاق كۇرەسى، قول كۇرەس، ءوزىن تانىستىرۋ، ونەر، سۇراق-جاۋاپ سىندى 8 ءتۇرلى باسەكەدەن سايىستار ءوتتى. العاشقى كۇنى سپورتتىق سايىستا بىلەك كۇشى سىنالسا، ەكىنشى كۇنى سپورتشىلاردىڭ ءبىلىمى مەن وي ءورىسى سىنعا ءتۇسىپ، ونەرلەرىن ورتاعا سالدى.
ونەرى مەن ءبىلىمى، بۇلا كۇشى مەن ەپتىلىگى ەلدەن اسقان 23 جىگىت شىعىس جۇرتىن سپورتتىق سايىستىڭ قىزىعىنا باتىرىپ، كوكپەكتى اۋدانىنىڭ اسپانىن انمەن جىرعا بولەدى.
وسى سايىستا تۇركىستان وبلىسىنىڭ نامىسىن سوزاق اۋدانىنىڭ تۋماسى اكبار ەلۋباي ۇلى قورعادى. ناعىز جىگىتتىڭ قاسيەتى سىنالار سايىستا قارسىلاستارىنان وق بويى وزا شاپقان اكبار ەلۋباي ۇلى قازاق كۇرەسىنەن ءبىرىنشى ورىن الدى. ءدۇبىرلى دودادا 120 كەلىلىك تايىنشانى 20 رەت كوتەرىپ، جيىلعان جۇرتتى ءتانتى ەتتى. سۇراق-جاۋاپ سايىسىندا دا ءبىلىمى مەن بىلىگىن كورسەتتى.
اكبار ەلۋباي ۇلى ەركىن كۇرەستىڭ عانا شەبەرى ەمەس، جىگىتتىڭ سۇلتانى ەكەنىن دالەلدەپ، «تولاعاي سۇلتان-2019» حالىقارالىق سپورتتىق-شىعارماشىلىق سايىسىندا 1-ورىن الىپ، 1 ميلليون تەڭگە يەلەندى.
ەسكە سالا كەتەيىك، ءبىز بۇعان دەيىن شىعىس قازاقستاندا جىگىت سۇلتانى ءوتىپ جاتقانىن حابارلاعان بولاتىنبىز.
