سولتۇستىك قازاقستاندىق شارۋالار 1 ميلليون تونناعا جۋىق مايلى داقىل جينادى

وڭىردەگى 13 اۋداننىڭ 5 ەۋى اۋا رايىنىڭ قولايسىزدىعىنا بايلانىستى كۇنباعىستى تولىق جيناي الماي وتىر، دەپ حابارلايدى قازاقپارات ءتىلشىسى.

س ق و اكىمدىگىنىڭ وتىرىسىندا مايلى داقىلداردى جيناۋ ناۋقانىنىڭ قورىتىندىلارى شىعارىلدى. سولتۇستىك ءوڭىر ەگىستىك القاپتارىن ءارتاراپتاندىرۋدا كوش باستاپ كەلەدى. بيىل ديقاندار 1 ميلليونعا جۋىق گەكتارعا مايلى داقىلدار ەكتى. بۇل وتكەن جىلمەن سالىستىرعاندا 34 پايىزعا ارتىق.

وبلىستىق اۋىل شارۋاشىلىعى باسقارماسىنىڭ مالىمەتى بويىنشا، بىلتىر ءوڭىر ديقاندارى كۇزگى ناۋقاندا 715 مىڭ توننا مايلى داقىل جيناسا، بيىل 932 مىڭ تونناسىن قامباعا قۇيدى. گەكتار بەرەكەلىگى 10 سەنتنەرگە دەيىن جەتىپ وتىر. 5 اۋداننىڭ 20 شاقتى شارۋاشىلىعى اۋا رايىنىڭ قولايسىزدىعىنا بايلانىستى شامامەن 40 مىڭ گەكتارداي كۇنباعىس القاپتارىن جيناي الماي وتىر.

راپس، زىعىر جانە كۇنباعىس ءوسىرۋ - جوعارى تابىستى بيزنەس. سۇرانىس جوعارى، باعاسى دا ءبيدايعا قاراعاندا ەكى ەسە قىمبات. سونداي-اق، بيىل مايلى داقىلداردىڭ باعاسى ءوستى. راپستىڭ تونناسى بىلتىر 127 مىڭ تەڭگە بولسا، بيىل 133 مىڭ تەڭگەگە جەتتى. ءبىر توننا زىعىر ءۇشىن 105 مىڭ تەڭگە سۇرايدى، بۇل بىلتىرعى جىلمەن سالىستىرعاندا 15 مىڭ تەڭگەگە قىمبات. كۇنباعىستىڭ باعاسى 110 مىڭنان 115 مىڭ تەڭگەگە دەيىن جەتتى. بۇل ىشكى نارىقتاعى قۇنى، ەكسپورتتىق باعا ودان دا جوعارى.

«ەگىستىك القاپتارىن ءارتاراپتاندىرۋ باعىتى دۇرىس. بيىل مايلى داقىلدار القاپتارىن 976 مىڭ گەكتارعا دەيىن جەتكىزدىك. جاقسى ءونىم جينادىق. مايلى داقىلداردىڭ باعاسى ءوستى. تيىسىنشە، ءتۇسىم مەن ەڭبەك ونىمدىلىگى ارتادى. مايلى داقىلدار ءبيدايعا قاراعاندا 2,5 ەسەگە قىمبات»، - دەدى س ق و اكىمى قۇمار اقساقالوۆ.

ءوڭىر باسشىسى اۋدان اكىمدەرىنە شارۋاشىلىقتاردىڭ مايلى داقىلداردى جيناۋ ناۋقانىن جۋىق ارادا اياقتاۋلارىن قاتاڭ باقىلاۋدا ۇستاۋدى تاپسىردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى