استاناعا كەلەتىن كوگىلدىر وتىننىڭ 1 تەكشە مەترى قانشا تەڭگە بولادى

«بىزدە تيىسىنشە تەحنيكالىق-ەكونوميكالىق نەگىزدەمە بار. گازدىڭ باعاسى شامامەن 47 تەڭگە بولۋى مۇمكىن. ءبىزدىڭ جاعدايىمىزدا تابيعي گاز ارزان بولمايدى. ويتكەنى، وزدەرىڭىزدە بىلەسىزدەر، كومىر قازاقستاندا، جالپى الەمدە ەڭ ارزان وتىن سانالادى. ءبىراق، قىس ايلارىندا كومىر جاعۋدىڭ اتموسفەرا اۋاسىنا قانداي زيان كەلتىرەتىنىن كورىپ جۇرسىزدەر»، - دەپ جاۋاپ بەردى قانات بوزىمبايەۆ.

ونىڭ ايتۋىنشا، «سارىارقا» گاز قۇبىرىنىڭ قۇرىلىسىمەن قاتار قاراعاندى، اقمولا وبلىستارىنىڭ جانە استانا قالاسىنىڭ اكىمدىگى جەرگىلىكتى گاز جەلىلەرىن سالۋ جۇمىستارىن جۇرگىزۋى ءتيىس.

«بيىلعى جىلدىڭ ءبىرىنشى كەزەڭىندە ولار گاز تاراتۋ جەلىلەرىن سالۋ ماسەلەسىن قاراستىرۋلارى ءتيىس. ماسەلەن، ەلوردانىڭ ءبىر شاعىن اۋدانىنا نەمەسە سۋ قايناتاتىن قوندىرعىلارعا گاز جەلىلەرىن تارتۋ جۇمىستارىن كەلەسى جىلدىڭ سوڭىنا دەيىن اياقتاۋلارى قاجەت»، - دەدى ول.

مينيستردىڭ ايتۋىنشا، «سارىارقا» گاز قۇبىرىن كوكشەتاۋ، پەتروپاۆلعا قاراي سوزۋ بولاشاقتىڭ ەنشىسىنە قالادى. جالپى ماگيسترالدى گاز قۇبىرىن استاناعا دەيىن تارتۋعا 267 ميلليارد تەڭگە قاراجات جۇمسالادى. جوبالىق- سمەتالىق قۇجاتتاماسى مامىر ايىنىڭ سوڭىندا دايىن بولادى. ال ماۋسىم ايىنىڭ باسىندا مەملەكەتتىك ساراپتاما ەنگىزىلەدى.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى