كاسپي تەڭىزىنە 1 ميلليوننان استام اقسەركە بالىقتارى جىبەرىلەدى
دەپ حابارلايدى قازاقپارات ءتىلشىسى.
«ءساۋىردىڭ 1- كۇنى اقسەركەنىڭ ۇرعاشىسى ۇستالعان بولاتىن. سالماعى - 160 كەلى. بارلىعى سول بالىقتىڭ تاعدىرىنا قاتتى الاڭدادى. وسى ورايدا ءساۋىردىڭ 18- كۇنى ول بالىقتان 30 كەلى 600 گرام ۋىلدىرىق الىندى. ول شامامەن 1 ميلليون 200 مىڭ دانا ۋىلدىرىق بولادى. سونىڭ بارلىعىن جاساندى جولمەن ۇرىقتاندىرعاننان كەيىن ينكۋباتسيالىق اپپاراتتارعا ورنالاستىردى. ەندى، شىلدە ايىندا كادىمگىدەي بالىقتاردى تەڭىزگە جىبەرەتىن بولامىز»، - دەدى ءجۇنىسوۆ.
ونىڭ ايتۋىنشا، بۇگىندە باتىس قازاقستان وبلىسىندا اقسەركەنى وسىرەتىن ەكى زاۋىت بار. اعىمداعى جىلدا ول كاسىپورىندار شامامەن 7 ميلليون اقسەركە بالىقتارىن تەڭىزگە جىبەرۋدى جوسپارلا وتىر.
ايتا كەتەيىك، وسى ايدىڭ باسىندا اتىراۋداعى «امانگەلدى» وندىرىستىك كووپەراتيۆى سالماعى 160 كەلى بولاتىن اقسەركە بالىعىن ۇستاعان بولاتىن. بالىقتىڭ ۇزىندىعى - 230 سانتيمەتر. وسىدان ءتورت جىل بۇرىن اتالعان كووپەراتيۆ 300 كەلىلىك اقسەركەنى ۇستادى دەگەن اقپارات بار.
ايتا كەتەيىك، بۇگىندە كاسپي تەڭىزىندە بالىق اۋلاۋعا تىيىم سالۋ ماسەلەسى قارالىپ جاتىر. اتىراۋ مەن ماڭعىستاۋ وبلىستارىنىڭ اكىمدىكتەرى بۇل باستانى قولداپ وتىر.
اۆتور: ارمان اسقاروۆ
