ستيۆەن سيگال استانادا ۇرىس ونەرىنىڭ 1- حالىقارالىق فەستيۆالىن اشتى
«مەن سىزدەرگە العىسىمدى جەتكىزگىم كەلەدى جانە استانانى تۋعان كۇنىمەن قۇتتىقتايمىن. ۇرىس ونەرى ادامعا دەنە جانە اقىل- وي ءورىسىن كەڭەيتەدى. سونىڭ ارقاسىندا ءبىزدىڭ وتباسىلار، جالپى قوعام دامۋدا. ءبىز بۇنىڭ بارلىعىن بالالارىمىزدىڭ دەنساۋلىقتارىن، رۋحاني الەمدەرىن ساۋىقتىرۋ ءۇشىن جاساپ جاتىرمىز»، - دەدى ول.
بۇگىن 200 قاتىسۋشى 12 ءتارتىپ: ايكيدو، دجيۋ- دجيتسۋ، كاپوەيرا، بۋدزينكان، تايبوكس، كاراتە گودزيۋ- ريۋ، شين كالي، كەندو، تاەكۆوندو، ۆين- چۋن، شاولين جانە قويان- قولتىق ۇرىس بويىنشا ونەر كورسەتەتىن بولادى.
فەستيۆالگە براتيسلاۆ ستاييچ، الەكس كۋنين، ماركوس انتونيو دا سيلۆا، كيم گي بوك جانە لي حانگ چەونگ سىندى شىعىس جەكپە-جەكتەرىنىڭ شەبەرلەرى قاتىسۋدا. قۇرمەتتى قوناق رەتىندە گولليۆۋد جۇلدىزى ستيۆەن سيگال، رەسەيلىك كيكبوكسشى، الەم چەمپيونى باتۋ حاسيكوۆ پەن اكتەر ءارى كاسىپقوي سپورتشى سەرگەي باديۋك كەلىپ وتىر.
«فەستيۆال ەكى كەزەڭنەن تۋرادى. بىرىنشى ءبولىمى - كورنەكى ورىنداۋلار مەن شوۋ. ءبىز ەڭ تاڭدامالى ەلەمەنتتەردى كورسەتەتىن بولامىز. ءاربىر ۇرىس تۇرىنەن ادامدارعا پايداسى بار ءبىرقاتار ادىستەر ۇسىنىلادى. ەكىنشى ءبولىم - ەڭ ۇزدىك مامانداردان، سەنسەي مەن شەبەرلەردەن ساباق. بۇل ءبولىم نەگىزىنەن فەدەراتسيادا شۇعىلدانىپ جۇرگەندەرگە ارنالادى. ولاردىڭ كاسىبي دەڭگەيىن ارتتىرۋعا باعىتتالعان»، - دەيدى ۇيىمداستىرۋشىلاردىڭ ءبىرى سانات شاپاشوۆ.
ايتا كەتۋ كەرەك، كورنەكى ورىنداۋلاردى تاماشالاۋعا 3000 عا جۋىق ادام كەلىپ، تاماشالايدى دەپ كۇتىلۋدە.
اۆتور: جاسۇلان جولدىبايەۆ
