قاراعاندى وڭىرىندە 1 عاسىرعا جەتەتىن مىس، التىن، كۇمىس قورى بار
قاراعاندى وبلىسىنىڭ قارقارالى اۋدانىندا ۇدەمەلى يندۋستريالىق- يننوۆاتسيالىق دامۋ باعدارلاماسى بويىنشا سالىنىپ جاتقان، ءساۋىر ايىندا ىسكە قوسىلاتىن «التاي پوليمەتالل» كاسىپورنى وسىناۋ كەن كوزدەرىن يگەرۋدە اسا ماڭىزدى ءوندىرىس وشاعىنا اينالعالى وتىر.
قازىر مۇندا قۇرىلىس جۇمىستارىنىڭ 90 پايىزى اياقتالعان. الەمنىڭ وزىق تەحنولوگياسىمەن جۇمىس ىستەيتىن كەن بايىتۋ فابريكاسى جىلىنا 3 ميلليون توننا ءونىم وندىرەدى، دەپ حابارلايدى khabar.kz.
مىس، التىن، كۇمىسكە باي كەنىشتەردەگى كەن قورى شامامەن 100 جىلعا جەتەدى دەپ بولجانىپ وتىر.
مامانداردىڭ ايتۋىنشا، مۇنداعى كەندى ۇنتاقتاپ- سۇرىپتايتىن زاماناۋي كەشەندەر ازىرگە ەلىمىزدىڭ ەشبىر وندىرىسىندە جوق. ەرەكشەلىگى، كەنىشتە جۇك كولىكتەرى مۇلدەم قولدانىلمايدى. ياعني شيكىزاتتى وندىرىسكە تاسىپ شىعىندالۋدىڭ قاجەتى جوق. قازىلعان كەن كونۆەيەر ارقىلى تىكەلەي فابريكاعا جەتىپ، وڭدەلەدى.
مامانداردىڭ ايتۋىنشا، مۇندا جىلىنا 3 ميلليون توننا ءونىم وندىرىلمەك. يننوۆاتسيالىق جوبا قۇنى 14 ميلليارد تەڭگە. گەولوگتاردىڭ بارلاۋى بويىنشا، قويناۋى قازىناعا تولى وڭىردە 1 عاسىرعا جەتەتىن مىس، التىن، كۇمىس قورى بار.
«كاسىپورىننىڭ تاعى ءبىر ەرەكشەلىگى، قورشاعان ورتاعا زيانى جوق. ءوندىرىس قالدىقتارى ارنايى قوندىرعىدا ءسۇزىلىپ، وڭدەلەدى. مۇندا تەحنيكا قاۋىپسىزدىگىنە دە ەرەكشە ءمان بەرىلگەن. بارلىق جۇمىس اۆتوماتتى تۇردە جۇزەگە اسىرىلادى»، - دەيدى «تەرەكتى» كەن بايىتۋ فابريكاسىنىڭ باس ديرەكتورى قۋانىشبەك جاقىپبەكوۆ.
كاسىپورىن تولىق جوبالىق قۋاتىنا ەنگەن كەزدە 300 دەن استام جۇمىس ورنى اشىلادى. قازىر مۇندا 186 ادام ەڭبەك ەتىپ جاتىر. فينليانديا، فرانسيا، يتاليادان كەلگەن كاسىبي ماماندار ولارعا زاماناۋي قوندىرعىلاردا جۇمىس ىستەۋدىڭ قىر- سىرىن ۇيرەتكەن.
